BJP Mizoram Pradesh President Vanlalhmuaka chuan Inrinni khan an pisaah thuthar thehdarhtute a kawm a, BJP party-in Mara Autonomous District Council (MADC)-ah sorkarna an siam thuai dawn tih a sawi.
Zirtawpnia MADC session-ah BJP leh MDC-te chuan MNF leh INC kaihhruai MADC sorkar chu rintawk lohna ‘No Confidence motion’ an put luhah tumah thlem hranpa emaw, tute emaw party tih dan angin nihna leh sum leh pai pek tumna pawh nei chuang loin, MNF party-a MDC pathum chuan an thlawp tih Vanlalhmuaka hian a sawi.
MNF MDC pathumten BJP an thlawp chhan sawiin Vanlalhmuaka hian MNF party kalhmang leh MNF General headquarters-a an hotute, a bikin Chief Minister Zoramthanga kaihhruai dan chu tha ti loin, state-a sorkarna chelhtu mah nise, rinna nghat ngam loin an duhthlanna ngeiin MADC-a an thawhpuite kalsanin BJP an thlawp a. Hetiang a lo nih takah chuan MADC-a BJP MDC-te chuan sorkarna siam turin dan ang thlapin kawng an zawh leh mek tih a sawi a, “Hun reilo teah BJP-in MADC-ah sorkarna kan siam thuai dawn a ni,” a ti.
BJP state president hian MADC-a sorkar, CM Zoramthanga kaihhruai MNF leh Lalsawta kaihhruai Congress ten an siam sorkar chu mipui hmangaihna nei lo, lal duh ringawt sorkar siamah puhin, “Mara mipuite thuthlukna palzutna leh zah lohna a ni,” a ti bawk.
Vanlalhmuaka hian MADC sorkar siam hmasak a, sorkarna an siam theihna atana mawhphurhna neitute, tu pawh ni se Mara mipuite zah lohna avanga thil tih a ni tih hi an ngaihdan a nih avangin, a hun takah MNF leh Congress te chungah Mara mipui aiawhten huaisen takin hma an la ta niin a sawi a. Hetiang chiah hian tuna state-a sorkarna chelh mektu Zoramthanga kaihhruai, MLA 28-te zingah hian a la thleng dawn niin a sawi.