Bangladesh Chittagong Hill Tracks-a Zohnahthlakte chu an sahimna zawngin Mizoramah an luh belh zel a, Lawngtlai district-a Parva III khuaa raltlan awm zat chu 294 an tling tawh.
Bangladesh ram chhung, Chittagong Hill Tracks-a Bangladesh sipai leh Arakan Army tangdun leh Kuki, Chin National Army-te inbeihna avangin Zohnahthlakte chu an sahimna zawngin Mizoramah lutin Parva III khuaah an awm a, Zirtawpni zan khan Bangladesh ram chhung, Chhippui khua atangin mi 21-te an luh belh leh a, a hmaa lo awm tawh sa nen raltlan 294 an awm tawh a ni.
Parva III Refugee Committee Chairman Gospel Hmangaihzuala chuan raltlante chu sub centre, community hall leh school-ah awm lailawktir an ni tih a sawi a, Thawhtanni atangin relief camp an sa tan dawn a, tuna an ruahman dan chuan chhungkaw 80 awm lenna tur sak phawt an tum tih a sawi a; an khuaa raltlan awm mek zinga chhungkaw 34-te chu Chamdur lamah insawn an tum thu an sawi a ni.
Gospel Hmangaihzuala chuan tun dinhmunah chuan Lawngtlai DC hnen atangin sum fai leh buhfai bakah mamawh dang thil pek an dawng tawh a, Lunglei Sub Headquarter YMA leh Lawngtlai district chhunga tlawmngai pawl dangte pawhin tanpuina sum fai leh mamawh dang an pe nual tawh tih a sawi a, hetihlai hian mikhual an ngah em avangin ei leh in a hautak a, an thil pek dawnte chu an ei zo zung zung zel a, harsatna liantham an tawh loh nan puih an ngai hle tih a sawi.
Bangladesh atang hian Mizoramah raltlan an la awm belh zel dawn niin a lang a, Gospel-a chuan tun dinhmunah hian Chittagong Hill Tracks atanga Mizoram lam pana ramhnuaia la thang mek thahnem tak an awm nia thu an dawn thu an sawi a, raltlan hi an pun zel chuan a buaipuina kawngah harsatna tawh palh thei a ni a, anni lo buaipuina kawngah tanho a tul dawn hlea an ngaih thu a sawi bawk a ni.