March a pel fel ta, Assam Rifles an la chhuak lo!
March thla kan pel leh ta fe mai. February thlaah khan thla dang aiin ni awm zat a tlem zawk a, leap year kum a lo ni lo lehzel bawk nen, ni 28 chauh kan nei a, tunah kan hmang zo leh ta mai bawk nen; hetih lai hian Aizawl khawpui lun lai takah erawh Assam Rifle te an la awm reng a, chhuah zai an la rel thei chuang lo.
Hetia sawi loh theih loh hian January ni 28 khan kan chief minister chuan AMC inthlan campaign-naah AR te chhuah tur thu a lo sawi tawh a, “Aizawl khawpui atangin Assam Rilfles-te an chhuak thuai dawn,” a ti a. Assam Rifles-te chu kumin February chhunga Zokhawsanga pem vek tura nawr an nih thu leh za rual vel an insawn tawh thu a lo sawi diam tawh a ni.
Mahse, March thla kan kai a, a za rual vel insawn thawm bak kan hriat chhunzawm leh ta si lo nen, kan CM hian campaign auhla mai maiah a lo hmang em ni ang tih chu zawhna awm thei a ni a. Mahse, mipuite hi kan fel em mai a, kan phun lem lo niin a lang.
Politician te hian tawngkam chhak chhuah mai mai hi an chingin, lo awih tawk lah hi kan awm zel mai si a, hei hi tun hma atanga kan ram kalphung ni tura ngaihna a lian tawh hle. Chuvang chuan, tlema upa lam tawhte hi chuan chawlhsan ve hret hret ngam tawh se, thalai lehkhathiam leh a ngaihna hria, thianghlim bawk site kutah hian rorelna fawng kian ngam ve tawh se tih hi mipui rilru a ni chho tan mek a, bumin kan awm leh thin erawh a pawi a ni.
Chief minister leh MNF president ni bawk hian, “Aizawl mai ni lo, Mizoram hmun danga kan ram min chhuhtu sipaite pawh umchhuah vek kan tum,” a ti a. Hemi chungchang hi prime minister leh union home minister pawh a sawipui tawh niin a sawi bawk a, heng lehkhate leh hmalaknate hi an sorkar chhung ngeia a hlawhtlinna hmuh hman a chakawm hle.