Gujarat assembly inthlan turah vote nei zinga a zahve dawn hmeichhia an nih laiin candidate erawh an tlem hle a, bial 182 chuhtu mi 1,621 zinga 139 chauh hmeichhia an ni.
Rorel lai, BJP leh eptu, Congress chuan an tih dan pangngaiin hmeichhia an dintir tlem hle a; mahse, kum 2017 ai erawh chuan an tam hret ve ve.
BJP hian hmeichhia 18 dintirin 2017 khan 12 an dintir a. Congress-in a hmaa 10 an dintirah tunah chuan 14 an dintir a. Party pahnih hian a hma aiin Dalit leh tribal hmeichhia an dintir tam zawk hret bawk.
Sayajigunj, Vadodara biala Congress aiawha ding, Ami Ravat-a hi inthlanah hmeichhiate tan 33% hauh a nih theih nana parliament-ah pawh an bei tih a sawi a. BJP state women wing head Dipikaben Sarvada chuan an party chuan hmeichhiate tan chanvo pawimawh an dah thin tih sawiin president atan hial pawl an hmang niin a sawi.
Election Commission-in data a neihah thla thara inthlan tura chuhtu mi 1,621 zingah hian hmeichhia 139 an awm an zinga 56 chu independent-a chuhtu an ni.
Kum 2017 khan hmeichhe chuhtu 126 an awm a, mi 1,828-in an chuh a. Hemi kum hian hmeichhia 13 an tling a, BJP pakua leh Congress pali an ni a. Hmeichhia 104-in an dahkham an chawi.
Aam Aadmi Party (AAP) chuan candidate 182 an nei a, an zinga pakhat a inhnukdawk a. Candidate zinga paruk chauh hmeichhia niin pathum chu Scheduled Tribe (ST) tana bial hauhva ding an ni.
All India Majlis-E-Ittehadul Muslimeen (AIMIM) chuan bial 13-ah inthlan hi chuh dawnin hmeichhia pahnih an tel a. Pakhat hi Muslim niin Dalit mi a tel bawk a. Vejalpur bialah Zainabbibi Shaikh dintirin Danilimda bialah Kaushikaben Parmar an dintir a. Bial hnih hi Ahmedabad khawpui chhunga mi ve ve an ni.
Bahujan Samaj Party (BSP) chuan bial 101 an an chuhah hmeichhia 13 an tel.
BJP chuan hmeichhe MLA an neih lai zinga mi pakua an paih a, pali erawh an la dintir a. Heng zingah hian Scheduled Caste (SC) tana hauh Gandhidham-ah Malti Maheshwari, Gondal bialah Gita Jadeja, Asarwa-ah Sangita Patil leh SC tana hauh tho, Vadodara bialah Manisha Vakil te an dintir.
Congress chuan MLA hmeichhia pali an neih lai zinga pahnih an din nawntir bawk.