Pakistan prime minister atanga paih thlak, Imran Khan chu chawlhkar thum liam taa kah hliam a nih hnua a vawi khat nan mipui hmaah a inlan leh ta a, pungkhawm an tam hle.
Rawalpindi khawpuia kawng zawhah hian mi an tam hle a, flag leh party sign an keng nasa.
Cricket star hlui hian mipuite chu thih hlauhna nena nung lo turin a fuih.
Rawalpindi-a hun hmanah hian Khan-a hi darkar eng emaw zata a inlan hun tihkhawtlai a nih hnuah a inlan meuh chuan mipuiin an lawm hle.
Hmeichhe pakhat chuan Khan-a avanga kal ve a nih thu leh amah chauh ni lo, Pakistan mipuite pawh an ni vek tih a sawi a, “Kan lama tang hruaitu tan ka kal ve,” a ti.
“Thil dik lo tam takte au chhuahpuitu pakhat chauh a awm a ni,” tiin mipui zinga pa pakhat chuah a sawi a. “Hma lam a thlir a, hmathlir min neihpui a ni,” a ti.
Khan-a hun hmannaah hian venhimna khauh taka tih a ni a, mipuite chu prime minister hlui thlawpna hla sain loudspeaker hmangin Pakistani hla hrang hrang tihrik a ni bawk.
Khan-a hian thu a sawinaah a laka chet thawh tum ‘mi sual pathum’ an la awm tih a sawi bawk.
Amah thlawptute hnenah hian ‘hlauhnain ram pum chu salah a siam’ tiin a sawi bawk.
Thu a sawinaah hian thuneihna a chan chhungin ei rukna tihbona kawngah a hlawhchham thu a sawi a, ‘dan hnuaia thiltihtheihna a hmang lo’ tiin a sawi.
Rawalpindi-a hun hman hi Khan-a’n inthlanpui neih theih a phut nana kawng a zawha a tawn san lai ber a ni.
Hemi hma hian thuneitute chuan tharum thawhna a thlen hlauhthawnna avangin kawngpui dangin a thiltih tum ti lo turin an ngen.
International cricket star thin hi kumin kumtir khan parliament-a amah rintawk loh a nih avangin paih a ni a, vantlang pisa luah thei lo tura tih zui a ni.
Prime minister a nih lai hian dik tawk chiah lovin thilpek a dawng nasa nia puh a ni a, heng zingah hian Rolex sana, zungbun leh cuff link te pawh a tel.
Khan-a chuan heng thil hi dik lo engmah a awm loh thu leh politics-a an beihna mai niin a sawi ve thung.
Paih thlak a nih hnuah Pakistan-a sorkar leh sipai hotu thiltithei tak sawiseltu ber a ni.
An ramah hian a la lar em em a, kawng a zawhnaah pawh mi a hip khawm nasa hle.
Sorkar chuan nakumah inthlanpui huaihawt an tum thu an sawi.
Pakistan-ah hian politics avanga tharum thawhna lian tak tak a lo thleng tawh thin a. A langsar ber chu prime minister hlui, Benazir Bhutto-i kum 2007-a vantlang inkhawma hun a hmannaa thah a ni kha a ni.