World champion ni lai chu kumin World Cup a knockout stage thleng hmasa ber an ni a. Denmark lakah hnehna changin round of 16 atan an chiang tawh.
Inrinni zanah Stadium 974-ah Denmark nen an inkhel a. France tan forward chhuanvawr Kylian Mbappe chu team chakpuitu niin goal tha vawi hnih a khung a. 2-1 in an chak.
Mbappe hian first half-ah penalty area chhunga chance tha tak a neih chu a khung thei lova, Denmark goalkeeper Kasper Schmeichel-a’n a lo dang.
Mahse second half-ah inkhel a goal hmasa ber khung turin a ti tha hle a. Theo Hernandez nen Danish defense an thiat mawi.
Denmark in team chhia an ni lo tih lantirin goal an khung leh ve nghal thuai. An defender Andreas Christensen chuan France corner pet chhuah lawk theih loh chu remchangah la in goal a khung.
Mahse Mbappe-a’n minute 86-naah chakna goal a khung ta thova. Antoine Griezmann-a cross a khung chu an chakpui.
France in huntawp dawnah goal khung mahse Denmark hi a tawp thlenga bet an ni bik lo. Martin Braithwaite leh Pierre-Emile Hojbjerg te pawhin goal khungna remchang an nei. Lehlamah an goal khungtu Christensen chu Mbappe a pawh tluk avanga hnawhchhuah a ni lo chu a vannei hle.
France head coach Didier Deschamps chuan, “Kan tan chuan point ruk hmuh nghal hi duhthusam a ni. Ni li hnuah khelh leh tur kan nei a, kan tling chiang tawh hian thil a ti hahdam zual dawn.” tiin an dinhmun tha chuan player te hahchawlhna hun a siamsak thei dawn niin a sawi.
Messi nge nge
An group match hmasa berah Saudi Arabia lakah an mualpho. Mexico nen inkhel lehin first half-ah an beisei angin an khel lo.
Mahse khawvela thiam ber an nei miau a, a hun takah Lionel Messi a inlar.
Lusail Iconic Stadium-ah minute 64-naah Messi-a’n ball a chang a, insiamrem nghalin metre 18 a hla atangin a ke veilam in a pet lut mawi.
Argentina an phur sawt a, first half-ah Mexico in taima leh huaisen takin an hlauhawm thin tur veng mahse an mamawh goal an nei tawh. Huntawp hma in goal an khung belh leh a. Messi bawk a bul tumtu niin a ball pek luh atangin Benfica midfielder Enzo Fernandez chuan an goal hnihna mawi takin a khung.
Argentina hian Group C a an inkhel hmabak la awmah Poland an hmachhawn dawn a, hnehna an chan chuan knockout stage atan an tling chiang ang.