Aizawl: Congress Legislature Party (CLP) Leader Zodintluanga Ralte, Thorang bialtu MLA chuan a bial chhung khaw hrang hrang tlawhin, Inrinni khan Tuisenchhuah Community Hall-ah thu sawiin SEDP healthcare a awm lo niin a sawi.
SEDP healthcare chungchangah a beidawnthlakzia sawiin Zodintluanga Ralte chuan, “Assembly house zahawm takah CM leh Finance changtu, Pu Zoramthanga chuan SEDP healthcare cheng nuai hnih chhungkaw tin tan a awm tih a sawi a. Tun hnaiah journalist pakhatin RTI hmanga a zawhna chhannah chuan SEDP healthcare hi a lo awm hauh lo,” a ti.
Zodintluanga Ralte hian Mizoram State Health Care Scheme chiah a awm tih sawiin, hetah hian chhungkaw 39,505 lai inziak lutin pawisa tling khawm cheng vaibelchhe nga dawn lai chu mipuiah ni loin thawktute hlawh leh inrelbawlna atana hman niin, tah a tichhuak zawk tih a sawi.
MPCC Treasurer Zodintluanga Ralte hian ZPM chungchang sawiin, “An awm lohna khua apianga tam angin an insawi,” a ti a. ZPM hi mi thar ni loin, hmana UDA inti te, ZNP anga lo inzuar tawhte tho kha an ni tih a sawi a. ZPM hruaitute chu ui leh kel thlun pawlh ang mai nia sawiin, “Mipui hmuha inngeih awm taka an lan theihna turin luchunga kut nghatten an intawngtai a, an intawngtai lai thlalak hi nasa takin an vawrh darh dun a ni,” tiin, ZPM hi tu pawlah mah awm thei lo leh pawl inkaihhruaina hnuaia awm hlei thei lo niin a sawi bawk.
“Congress party chuan tang puihna hmangin a tum tak takte cheng nuai tel atanga vaibelchhe tel thlengin kan pui dawn a, tang ngaihna hre lo pawh kan pui ang. Congress chuan ‘kan ti ang’ kan tih chu kan ti zel thin a. He that loh theih lohna bawm avang hian Mizoram mipuiten Congress hi min thlang tling leh dawn,” tia sawiin, ZPM chu an tan a tawp tawh avang tun term hi an thlen san ber a ni dawn a, kum 2023 inthlan puiah Congress lo chu sorkar tur an awm lo niin Zodintluanga Ralte hian a sawi.