Aizawl : Rural Development Minister Lalruatkima’n Inrinni khan Mizoram state rural livelihoods mission (MzSRLM) buatsaih State level community led campaign against gender discrimination a hawng a. He campaign hi December ni 23, 2022 thleng awh tura ruahman a ni.
State level community led campaign against gender discrimination hi MzSRLM awmna district hrang hrangah kalpui a ni dawn a. . He campaign neih chhung hian Self help group member te hnenah hmeichhiate chunga hleilenna leh mipa leh hmeichhe inthliarna awm lo tura hmalakna chungchang zau zawka inzirtirna kalpui tum a ni.
Rural Development Minister chuan India sorkarin hmeichhiate dinhmun a ngaihpawimawh thu sawiin, Mizoram sorkar pawhin hmeichhiate hamthatna tura theihtawp a chhuah thu a sawi a. Mizoram chu India state dang te ngaihtuahin mipa leh hmeichhe inthliarhranna awm loh na, sorkar office, competitive exam leh politics ah te pawh hmeichhia ten dinhmun pawimawh tak tak an luahna a nih thu a sawi.
Mipa leh hmeichhe inthliarna tibo tura hmalaknaah inhrilhhriatna – awareness a pawimawh thu RD Minister chuan sawiin, kalkhawmte chu an veng chhung chanchinbuah te pawh an thil zirchhuah te report pe turin a ngen a. Sorkar chu miharsa leh retheite tan a ding zel dawn tih sawiin, khawtlang, kohhran, tlawmngai pawl leh department hrang hrang te chu hmeichhiate thliarhranna tihbo a nih theihna tura an thawhho a pawimawh thu a sawi bawk.