England in World Cup knockout stage a an hmun tihchian theihna remchang an neih an hmang thei lova. United States Men’s National Team nen goal inpe lovin an inhnehtawk.
Zirtawpni zana Al Bayt Stadium a inkhelah Gareth Southgate-a pawlte hi inkhela a langsar lo zawk an ni leh thin a. USA player-te tha za zawkah tangin an tlan taihmakna leh inpeknaah an tluk lo fo thin.
England tan tlarhnungah club lamah sawisel hlawh thin Harry Maguire a ding nghet a, an tlarhnungah a lai luahlum hnehin ani awm lo se USA in goal an khung a rinawm.
American team hian midfielder Weston McKennie hmangin goal an khung teuh a, a hmawr a bawk tha tawk lo. Christian Pulisic chuan first half-ah goal bar a pet per bawk.
England tana chance nei tha ber chu Mason Mount a ni a, USA goalkeeper Matt Turner chuan a dansak a tha hle.
Three Lions hi Iran laka goal ruk khung thei an ni chungin USA hmaah erawh an goal nawr a bil hle a. Tun World Cup-ah an thleng thui dawn a nih chuan an tlarhma siksawi deuh a ngai dawn niin tam takin an ngai.
Nimahsela Group B-ah an dinhmun a that tawh avangin qualify tura ngaih erawh an la ni tho.
England manager Southgate chuan an fans ten an player-te an ‘boo’ chungchang chu sawiin, “Kan fans te tihlawm hi kan duh a, vawiinah kan ti thei lo. Kan tum erawh knockout stage atana tlin a ni a, match thum kan nei a, tunah match hnih khelin hun kan la nei. Midang pawhin match hnihah chuan an thei vek bik dawn lo tih ka hria.” tiin inkhel zawhah a sawi.
Group A lamah tling thei pathum la awmin Netherlands leh Ecuador te 1-1 in an inhnehtawk.
Khalifa International Stadium-ah PSV Eindhoven forward Cody Gakpo chuan Dutch team hi minute 6-naah hma hruaipui nghal mahse an goal an venghim tluan thei lo.
Ecuador forward Enner Valencia chuan tun tournament a a goal thumna a khung a. Inhliam vanga lakchhuah ngaiin a inkhel zo lo.
An group-ah ram pahnihte point hmuh a inang mek a, Senegal in beisei an la nei bawk.