MNF adviser, home minister ni bawk, Lalchamliana’n nimin khan MNF pisa, Hnam Runah thusawiin, “Mizoramin a hauh mek, 1875 Innerline Forest Area hi Assam-in min pe phal ta se, Assam-a assembly bial nga rin luh a ngai dawn a, ‘Kan duh tak tak ang em?’ tih hi zawhna lian tak a ni,” a ti.
Lalchamliana chuan, “Kan ram hauh chinah hian Assam chhunga Assembly Constituency panga rin luh a ngai dawn avangin kan duh tak tak ang em tih chu opinion poll lak hialna tur a nih hmel,” a ti a, mi thenkhatin, ‘kan umchhuak vek anga ni mai lawm’ ti ringawt mah se a tak ramah erawh chutiangin a chet theih tawh loh tih hriat tlan a that thu a sawi.
Hemi chungchang hi tun hnaia Mizoram leh Assam sorkar aiawhte ramri chungchanga Gauhati-a an inbiakna a sawinaah a sawi chhuak.
Home minister chuan dan loa kuhva sumdawnna chungchang a sawi bawk a, kuhva hrim hrim chu danin a phal loh thil a ni lo a; mahse, Myanmar nena insumdawn tawnna tur border trade a la awm loh avangin dan anga lak luh phal a ni lo tih a sawi a, boder trade mumal a awm hunah chuan dan anga lak luh theih tur zinga mi a nih thu a sawi.
Tun dinhmunah chuan kuhva ro sumdawnna hian Mizorama kuhva chingtute ngei pawh harsatna a thlen a, hei hi sorkarin tihkian tumin hma a la a, police check gate pawh siam a ni a; mahse, dan sen erawh a ni lo tih a sawi a, khawchhak atanga dan loa kuhva rah tawlh tihtawp chu Mizoram sorkar tih theih bak a nih thu leh chumi avang chuan an hmalaknaah result tha an la nei thei lo tih a sawi a ni.
Mizorama raltlan awm mekte chungchang sawi bawkin, sorkarin sum a neih loh avangin Myanamr raltlante chu duh ang thala an tanpui theih loh thu a sawi rualin a theih ang anga an puih thu a sawi a, kohhran leh tlawmngai pawlte tanpuina azarah Myanmar raltlante chu harsa lutuk loa an awm nia an hriat thu a sawi.
Tun hnaia Bangladesh atanga Mizorama tlan lutte chungchang sawi zawmin, Parva khua leh a chheh velah mi 300 dawn an awm mek thute, anni hi Zohnahthlak an nih angin chenna tur hmun pek leh ei leh in tur lo pek chu tihsak ngei tur an nih thu a sawi a, sorkar pawhin tanpuina pek dan tur a ngaihtuah tih a sawi.
Lalchamliana chuan police thi aiawh tur an chhungte thun tur chungchanga an hmalakna sawi bawkin, “Sorkar hmasain compassionate ground-a lak tura a lo thlan tawhte chu sorkarna kan chan tirh atangin kan an bawhzui nghal a; mahse, Covid-19 leng avangin a khawtlai ta a, tunah hian tihfel mek a ni ta,” a ti.
Compassionate ground-a police-a an thun turte chu March, 2019 thlenga dilna awmte a nih thu a sawi a, a hnu lama boralte erawh tunah chuan tihfel theih a la nih rih loh thu a sawi a; police lak rûnpui kalpui turin dilna thlen thin mah se tun thlengin phalna an la hmu thei rih lo tih a sawi bawk a ni.