Khawvel football atanga thlirin ram ropui an ni a, talent tha leh ropui lo chhuahna thin an ni. Tunah erawh group stage a tlak loh an khel tawh a, beiseina beitham tak la nei turin Spain lakah goal khat an khung hram a, 1-1 in an inhnehtawk.
Pathianni zanah Al Bayt Stadium-ah ram pahnihte inkhelin group stage draw neih atanga inkhel nghahhlelh ber zing ami a thleng.
Ram pahnihten result tha neih tumin football an khel a, mahse an theihna ang takin an khelchhuak lo tih a chiang. Germany chu a tlawm zawkah an tang mai dawn nia a lanlaiin striker Niclas Fullkrug chuan goal pawimawh a khung a. Point khat hmu in an tan round of 16 kawng a la inhawng.
Kawng a la awm
An inkhelh hma in Costa Rica in 1-0 in Japan an hneh a, hei hian Group E a intlansiakna a hawng zau. Hei vang hian Germany in beiseina nei sang sawtin tlai inkhel result khi danglam se, Spain laka an tlawm chuan tla chiang nghal tur an ni.
Hansi Flick-a pawlten chak ngei tumin bul an tan a, mahse an tum angin football an la khel thei lo.
Spain in ball inpe kual tha in an passing mawi khelh an tum thin. Engemaw chen ti thei mahse anni pawn a hmawrbawk lamah tlin loh an nei.
Germany in taima leh tangrual takin an ‘press’ a, Spain player-te ball thunun tur chhutchah an tum a, engemaw chenah an hlawhtling thin.
Minute 62-naah first half a team hlauhawm zawk Spain in goal an khung a. Jordi Alba cross chu substitute Alvaro Morata chuan goal-ah a chantir.
Germany in theihtawp chhuahin a tawp thleng an bei a. Anni pawn striker pangngai Flullkrug an dah luh hnuah minute 83-naah an si phurh a sut a. Leroy Sane hmangin chak teuh mahse German forward in remchang a neih atang ball tha a chhuah hman lo.
Germany in Ningani zanah Costa Rica an hneh ngei a ngai tawh a. Spain pawh Japan lakah an chetsual a la thiang bik lo.
Croatia an chak ta
Morocco laka goal an khung theih loh hnuah Canada in an laka goal khung turin second 68 chauh an mamawh. Mahse Croatia in an tawnhriat neih tawh an chhawr tangkai a. 4-1 in Canada an hneh.
Bayern Munich winger Alphonso Davies chuan goal hmahruai Canada tan khung mahse Croatia that zawkna a lang a. Andrej Kramaric chuan goal hnih khungin Marko Livaja leh Lovro Majer ten an khung bawk.