Aizawl: Mizoram Dragonfruit Farmers’ Association (MIDFA), North East Small Finance Bank leh horticulture department chuan nimin khan thawhhona thuthlung (MoU) an ziak.
Thawhona thuthlung hi horticulture department committee room-ah ziah a ni a. MIDFA aiawhin President Vanlalnuntluanga Renthlei, horticulture department aiawhin Director, Elizabeth Saipari, North East Small Finance Bank aiawhin John Lalawmpuia ten hming an ziak a ni.
Mizoram chhunga dragonfruit chingtuten thar chhuah tam zawk an neih theih nan te, hlawk zawka Mizoram pawna thawn chhuah tlaka quality tha a tam theih nana processing leh a vawn thatna, cold storage atana hmalak zel a lo nih theihnan he inremna hi an ziak.
Kum nga chhung atan thawhhona an ziak phawt a, hemi hun chhung a tawp hunah pawhsei zel theih a ni.
Horticulture Director Elizabeth Saipari chuan dragonfruit chinga hma la tak tak tura bul tanna nei lote tana bank an inher rem zel chu lawmawm a tih thu a sawi a. Horticulture department-in farmer-ten hlawk zawk leh tam zawk an tharchhuah theih nana bank leh association nena thawhhona thuthlung an ziak hian rah tha a chhuah a beisei thu a sawi.
Thusawitu dang, MIDFA president chuan dragonfruit chingtu pawlin ram pawna thawnchhuah tlak thar tura mumal zawka hmalakna an neih dante a sawi a. Horticulture department thlazar hnuaiah chauh innghat loa bank nena an thawkho tur hian farmer-ten hlawk leh tam zawk thar chhuah kawngah nasa takin a tanpui dawn niin a sawi.