Aizawl : BJP Mizoram Pradesh President Vanlalhmuaka chuan, kum 2023-a MLA inthlanpui lo awm turah mahnia sorkarna siam turin theihtawp chhuahin hma an la dawn tih a sawi.
Nimina an pisa-a kar thar inhlanna inkhawmah thu sawiin Vanlalhmuaka chuan, Mizoramah mirethei te’n lei rem an rah theihna tur leh mipui thleng phak hmasawnna tak tak neih theih nan, mahni tuma chiang leh mipui hmaa intiam ang ngeia hma la thin BJP chuan sorkar turin hma an la tih a sawi a. Nakkum MLA inthlanah mahnia sorkarna siam turin theihtawp chhuahin hma an la dawn a, mahnia sorkarna an siam thei lo a nih pawhin thawhpui tur tha tak an nei ngei dawn niin a sawi.
Vanlalhmuaka hian, Mizorama political party hrang hrangin mipui hmaa manifesto an insiam that siak mai mai thin nia sawiin, tun sorkar mek pawhin an manifesto chu an ziak tha viau a, mahse, a tak ram erawh mipui te’n an dawng lo thung tih sawiin, “Hei hian a entir chu leader tha leh mahni thutiam a dinglo hruaitu anni tih a ti lang a ni,” a ti.
Mizoram state thenawm te’n hmasawnna an neih ang leh mipui ten an chanvo leh hamthatna an neih hi hi Mizoram mipui in an chan ve theih nan BJP hmalakna leh hnathawh te zir chiang a, party dangin an huphurh avanga BJP an puh chhiatna dik lo te hrechiang a, Mizoramin hmasawnna kawng a rah ve theih nan leh retheihna sal atanga ataka a chhuah ve theih nan BJP hi sorkarna an pek ve a tul niin a sawi bawk.