Aizawl: Rokunga Memorial Society-in nimin khan Malsawmkima, Saitual Venglai hnenah Rokunga Award an hlan.
Aijal Club-a Rokunga Award 2021 hlanna inkhawmah hian Rokunga Memorial Society Vice Chairman B. Lalthangliana leh Award Selection Committee Chairman PC Lawmkunga ten Malsawmkima hnenah hian award an hlan a. Award hian trophy leh tangkapui bakah thuchei (citation) leh Rs. 50,000 a keng tel.
Rokunga Award dawngtu, Malsawmkima chuan a chawimawina dawn chu a phu lova a hriat thu sawiin, Zoram dung leh vangah amah aia phu zawk tam tak an awma a hriat thu a sawi.
Khawtlang leh ram leh hnam tana a thawh venaah hun harsa leh pik tak tak an lo paltlang changte leh mi huat hlawh khawpa thawh a tul chang pawha bei hram hram thei tura amah siamtu chu Mizo hnam a hmangaihna vang a nih thu a sawi.
Rokunga Award dawngtu hi kum 1978-ah Saitual khuaa tlawmngai bera puan a lo ni tawh a. Kum 2013-ah Saitual khawtlangin Tlawmngai Nopui an lo hlan tawh bawk.
Chawimawina hlan inkhawmah hian Dawrpui YMA Zaipawlin Rokunga hlaphuah pahnih, ‘Ro min relsak ang che’ tih leh ‘Raltiang i kai ve ang’ tih hla an sa a. Inkhawmah hian Saitual bialtu MLA, minister ni bawk, R. Lalzirliana; Saitual Venglai YMA leh Saitual Joint YMA hruaitu te, Saitual Welfare Association hruaitu te, hlaphuahtu Rokunga dam laia a kaihhruai thinte leh a rawngbawlpui la dam te, Rokunga chhungte leh he hun hmang tura sawm bik mi eng emaw zat an tel a ni.