Mixed martial arts inelna lian Ultimate Fighting Championship star Conor McGregor chu drug-testing an kalpuina huangah a la tel lova, cage chhung a luh leh hma in thla ruk chhung tal a awm phawt a ngai dawn niin USADA chuan an sawi.
United States Anti-Doping Agency hi UFC in drug-testing lama a thawhpui a ni a. An hnuaia kaldan phungah inelna hmachhawn turin thla ruk tal testing pool-ah an awm tur a ni.
UFC double champion ni thin Henry Cejudo pawhin MMA a chawlhsan thu a puan hnuah kumtira lo kir leh a tum chu tunah hian thla ruk chhung USADA hnuaia testing pool-ah awmin a nghak mek tawh.
McGregor hi USADA hnuaia tarlan danin nikum September hnuah an testing pool-ah hian a awm tawh lo. UFC Lightweight leh featherweight champion thin hi nikum July a Dustin Poirier laka a ke a tliah hnuah a inlan leh lo.
Nilaini khan fighter tawng duh leh a duh duh sawi ching tak McGregor hian February thla ah test theih a nih tur thu a lo sawi tawh a. Hei hi USADA chuan sawifiahin an testing pool-ah a awm loh avangin a awm hun atang thla ruk a nghah a ngai dawn a. UFC in nghak lova ngaihhnathiamna pek theih chu nei mahse an beisei loh thu an sawi tel.