Morocco chu kumin World Cup a team lian barakhaihtu hnuhnung ber an ni a. Chak tura rinkai, tunlaia player tha rual awmkhawmna Belgium 2-0 in an hneh.
Pathianni zana Al Thumama Stadium a inkhelah Africa hmar lam ram hi an kheltha zawk a ni mai lova, hei aia chiang zawka chak thei tur hi an ni.
Belgium goalkeeper Thibaut Courtois a chesual a, first half-ah pawh tihsual a neih tawh hnuah second half-ah, huntawp nan minute 17 a la awm tihin a chesual nawn a. An goal hmasa zawk chhuahin Abdelhamid Sabiri freekick pet chu a goal ban venlai nena an inkarah kalin a dang hman lo.
Belgium goal veng chauh erawhin an result-ah mawh a phur lo. Team pumpui an kheltha tawk lova, lehlamah Morocco in anni aia player malkhai a skill tha zawk team lakah huaisenna an lantir a. |anrualna leh beidawng duh lova an tlan taihmakna an hlawhtlinpui.
Belgium in an si phurh sutna goal an zawnlaiin minute 92-naah Zakaria Aboukhlal chuan Hakim Ziyech-a ball pawhlet chu an goal hnihna ni turin a khung chiang hle.
Doha ah Morocco fans inkhel entu an thahnem a, mipui thawm pawh a ring hle.
Belgium hian an match hmasa zawkah Canada in football rang leh huai an khelh an chelh thei hram tawh a. Tun tumah Morocco tlarhnung inrem nghet tlat lakah harsatna an nei dawn lo niin first half-ah a lang hman.
Thorgan Hazard leh Michy Batshuayi ten Red Devils tan hlauhawm tak taka chet an nei a, mahse first half a goal khungtu Morocco niin Ziyech-a freekick Courtois dan thelh chu offiside avanga pawm a ni lo.
Hnehna an chan avangin Morocco hian point li an hmu mek a. Point khatin Belgium aiin an sang zawk.
Canada erawh an tlak chian tawh avangin Belgium hian knockout stage tling turin beiseina erawh an la nei.