Chief minister hlui, People’s Democratic Party chief Mehbooba Mufti chu Jammu & Kashmir thuneitute chuan Kashmir chhim lam, Anantnag district-a sorkar quarters a luah lai chhuahsan tura hriattir pek a nih thu thuneituten an sawi.
Inrinnia hriattirna an pekah hian Housing Colony Khanabal-a quarter number 7 chu darkar 24 chhunga chhuahsan turin an ti.
Anantnag bawrhsapin hriattirna a pekah hian, “Quarter i luah lai chu darkar 24 chhunga tiruak tura hriattir i ni a, chuti a nih loh chuan dan angin i laka chet a ni ang,” tiin a inziak.
October 20 khan Mufti-i hian Srinagar-a sorkarin in an luahtir, Fairview residence chu chhuahsan tura tihna a dawn thu a lo sawi tawh.
Mufti-i hian Srinagar-ah tho hian bungalow dang luah tur ruahmansak a ni tih sawi a awm bawk.
Jammu & Kashmir hi kum 2019-a union territory a nih leh hnuah chief minister hluite zawng zawng hnena hamthatna pek ang kha hlih vek a ni.
Kum 2020 khan chief minister hlui pahnih, Omar Abdullah leh Ghulam Nabi Azad te pawhin sorkar hmun an luah lai an lo chhuahsan tawh.
Mufti-i pa, Muhammad Sayeed-a pawh kha chief minister hlui tho a ni a, a pa hun lai atang tawhin sorkar inah an khawsa a. State dang ang lo takin Jammu & Kashmir chief minister-te hian an hun a zawh pawhin sorkar hmuna an inbenbelna hi an chhuahsan ve mai ngai lo a ni.
A awmna pakhat, Fairview Bungalow hi Srinagar-a Gupkar road-a awm niin tun hma chuan interrogation centre niin PAPA-II an ti thin a, kum 1989 thleng khan sorkar mi pawimawhte khualbuk atan hman a ni a. Kum 1990-a Border Security Force-ten an luah atangin a hming thar hi a pu a ni.
Centre a nih lai hian thil sawihona hmun atan an hmang nasa a, kum 1996 khan sorkar hna thawk lian, Ashok Jaitly chu lutin chenna atan hman tan a ni.