Inkhuahkhirhna kalpui duh lohna hi Wuhan leh Chengdu khawpuiah pawh Pathianni khan lantir niin kartawpah khan China-a university campus hrang hrangah zirlaiten an lantir bawk.
Beijing-ah pawh Thawhtanni zing hma takah khan pawl hnih, mi 1,000 vel chu Liangma River bula Third Ring Road-ah an pungkhawm a, an kal darh duh lo.
Pawl pakhat zawk chuan, “Hmai tuamna kan duh lo, zalenna kan duh. COVID test kan duh lo, zalenna kan duh,” tiin an au rual nghe nghe.
Ningania Urumqi-a kangmei a chhuah hnu, Zirtawpni tlai khan mipui lungawi lo an pungkhawm nghal a, “Inkharkhip tawp rawh se!” tiin an au rual a, an au pah hian an ban vaiin an kuttum pawh thinrim tih hriat takin an lek nasa hle tih social media-a video thehdarhah a lang.
Pathianni khan chhimthlang lama Chengdu khawpuiah mi tam zawk an pung khawm tih social media-ah thehdarh zui a ni a. Hetah hian ziak loh puan kengin, “Dam chhunga roreltu kan duh lo, emperor kan duh lo,” tiin president a nih hun chhung tawp thei lo ni mek, Xi-a chungchang an au chhuahpui.
Wuhan-ah pawh mi za tel khawlaiah chhuakin anmahni dalna siamte an paltlang a, puan ina siam COVID test-na hmunte tichhiain inkharkhip hlih an duh thu an aupui bawk.
Khawpui dang, hmarthlanga Lanzhou-ah pawh inkhuahkhirh duh lohna hi lantir a ni a. Mipuite chuan tute mah hri kai tih finfiah awm si lovin kharkhipna hnuaiah an awm ringawt tih an sawi.
“Inkharkhip hi mipuiin rei tak dawhthei takin an tuar tawh a; mahse, thuneituten hian emergency policy an neih hi an hmang sual tur a ni lo,” tiin Amnesty International-a Deputy Regional Director Hana Young chuan thuchhuah a siam a. “Hetianga duh lohna nasa taka an lantir hi mipuiin Covid-19 inkhuahkhrihna khauh tak an nin tawngkhawng tawhzia a lantir a ni,” a ti bawk.
“Chinese sorkar hian Covid-19 policy a neihte hi a hun leh a hman azira hman turin a ennawn ngei a tul tawh a. Mi zawng zawng inkhung hrang tura tih ngawt hian mi mal himna a tiderthawng zawk a, tul hauh lova mipui chetvelna zawng zawng khuahkhirh hi thil tul a ni lo,” a ti bawk.