State danga an tih thin ang bawkin BJP chuan ‘khawlpui pahnih hmang sorkar’ tiamin sorkar laipui fawng an chelh bakah state-a sorkarna chan chu kawng tinrenga hmasawnna thlen theitu niin an sawi.
Khawpui pahnih hmang sorkar an tiam hnuah hian Modi-a hovin an elpui party-te an bei zui thin.
“Kei hi mi sawiselna nasat ber ka ni ang; mahse, chungte chu ka pawmzam mai mai a, ram hmasawnna hi ka thinlungah a awm tlat zawk a ni,” a ti.
Modi-a hian Congress party chu sorkar laipuia thuneihna an chan laiin firfiaka chetna lakah an nem lutuk niin a puh a, kum 2008-a Mumbai beihna, mi 166 zet an thihna chungchangah pawh nem a ti.
An manifesto-ah chuan state sorkarin ‘anti-radicalisation cell’ an din tur thu leh hei hian firfiak tihthaih awm thin a tihbo dawn thu an tar lang.
BJP hian Uniform Civil Code (UCC) hman ngei an tiam a, hei hi ram mipui zawng zawngin personal law intawm neih a ni a, mi thiamte chuan sawi maia awl ni mah se a taka kalpui tur chuan thil har a nih a rinawm thu an sawi.
BJP hian campaign beihpui pawh an thlak nasa a. Tun thlaah ringawt pawh Modi-a chu vantlang inkhawm 20 chuangah thu a sawi a, vantlang tana tangkai tur scheme Rs. vaibelchhe 20,000 man hu zet a hawng a. Industrial project lian tak pahnih, Maharashtra-a bul lo tan tawh pawh Gujarat-ah an sawn bawk.
Modi-a’n heti taka state inthlana campaign a bei ngawrh hi mi thiam thenkhat chuan Gujarat-a BJP hi an phili buai deuh vang a nih theih thu an sawi a. An hruaitute hian thu an sawinaah sorkar tura campaign aiin Hindu nationalist tawngkam an hmang zauh zauh fo bawk niin an sawi.
An party mite erawh chuan hetiang titi awm hi a tak a nih loh thu an sawi thung.
BJP hian thawm nei lianin ngaihdan laknaah chak ngei tura ngaihna awm mah se chona lian tak an hmachhawn ve tho va. An MLA tanglai 19 zet, tun inthlana an dintir tak lohte chuan independent-in an chuh dawn hlawm a, vote tam tak an lak hek rin a ni.
State sorkar pawhin an laka lungawi lohna hrang hrang an hmachhawn ve me bawk a. Sorkar hnathawkte chu an hlawh leh pension chungchangah lungawi lohna an lantir a; inter-state river-linking project chu tribal-ten duh lohna nasa taka an lantir avangin an thulh leh a; khawlaia bawng tla tam lutuk khuahkhirhna tura dan siam chu a vulhtute a tithinrim hle bawk.