Congress party hian kum 2017 inthlanah khan BJP tana hlauhthawnawm deuh siamin bial 77-ah hnehna an chang a, eibar dinhmuna an hniam lutuka thingtlang mite thinrim vote an hui nasa a, hnam sang zawkte tana thil hauhsak tam lutuk avanga a hniam zawkte lungawi lo an hui teuh bawk.
Tun tum inthlanah hian an chet that beiseina a sang lo va; mahse, tribal leh Dalit lakah an insawhngheh theih sawt rinna a awm a, Muslim voter-te pawh an hui nual rin a ni bawk.
Khawpui lianah chuan BJP tan hian Congress aii AAP chu hlauhawm zawk tura ngaih a ni a. Arvind Kejriwal-a kaihhruai party hi khawtlanga khawsak hniam leh harsa zawk nia ngaih – tuk-tuk driver, kawng sira thil zuara inpho, sumdawng tenau leh industrial unit tenau neite an bitum nasa leh zual.
AAP hian a thlawna power pek, zirna a thlawna kalpui leh damdawi in awm man thlawn an tiam a, hei hi tuna ro an rel mekna, Delhi khawpuia an tih mek a ni.
BJP hian hmahruai chiang hlein lang mah se Gujarat inthlanah hian boruak a inthlak thut thut fo tawh thin a. State pawimawh inthlan a ni a, nakumah state tam tak inthlang tur an awm bakah kum 2024-ah inthlanpui a awm dawn bawk a, kumin kumtawp inthlan hi tu party tan pawha chet that a ngaih lai tak a ni.