Vawi nga champion tawh Brazil in World Cup knockout stage lut turin Switzerland an hneh a. Casemiro goal khung hmangin 1-0 in Swiss team an hneh.
Thawhtanni zana Doha a Stadium 974 a inkhelah attacking football hmuh tur a tam lo. Swiss lamin Brazil inkhel tur ven chu thupuiah an nei.
Selecao lamin an tlarhma a player hmuhnawmte hmangin goal hlauhawm siam an tum thin a, mahse an hlawhtling tam lo. An tih fuh tumin goal-ah an khung thei lova. Goal pawm loh an nei bawk.
Huntawp hma minute sarih a la awmin Brazil in goal an khung. Manchester United midfielder Casemiro chuan penalty area chhungah ball changin rang takin a chhuih nghal a. Swiss goalkeeper Yann Sommer a che hman lo.
Brazil in Serbia an hneh hnuah chak nawn lehin group-ah hmahruaitu ni turin Cameroon an hmachhawn hunah point khat bak hmuh an ngai tawh lo.
Brazil goal khungtu Casemiro chuan, “Goal ka khung a, mahse kan team chakna tura theihtawp chhuah kha a pawimawh ber. Kan chak in kan thawhho vang a ni a, kan tlawm pawhin a huho in kan tlawm. Ka rilru puthmang ka thlak lem lo. Champion tur chuan kan tanrual a ngai.” tiin man of the match a thlan a nih hnuah a sawi.
Portugal chakna Bruno
Uruguay lakah hnehna an sual chhuak a, Portugal in 2-0 a chakin round of 16 an inhlangkai.
Lusail Iconic Stadium-ah team pahnihte inkhelin beisei a pha lo. Chak zawk ni tur erawhin Portugal in Bruno Fernandes an nei a, an midfielder hi inkhelah a pawimawh hle.
Minute 54-naah an goal hmahruai a khung a. Penalty area chhunga a ball vawrh luh chu Cristiano Ronaldo chuan a tauh niin sawi mahse a tauh fuh lo niin a lang a. Uruguay keeper Sergio Rochet chuan dang lovin goal-ah a lut. Huntawp dawnah Jose Gimenez handball avanga penalty an hmuh chu Fernandes bawkin goal-ah a khung.
Uruguay in second half-ah hma sawnin goal khungna remchang vawi hnih uihawm takin an hloh. Rodrigo Bentancur-a’n Portugal keeper Diogo Costa save tha a siam tir a. Substitute Maxi Gomez chuan goal ban a pet per bawk.
Uruguay hian Ghana an hneh chuan Group H atang tlin beiseina an la nei tho.