CLP Leader Zodintluanga Ralte chuan kum li kalta chhung khan chief minister thusawi engmah tihhlawhtlin a awm lo niin a sawi.
Thorang bialtu MLA Zodintluanga Ralte hian a bial chhung, New Sachan leh Marpara a tlawhnaah thu sawiin kum li kal ta chhung khan chief minister thusawi engmah tih hlawhtlin a awm lo nia sawiin, Congress sorkar laiin Mizoramin hmasawnna hmel nasa taka hmuh thin a nih thu leh a tluk a awm ngai loh thu a sawi.
Chief minister ber thusawi engmah tihhlawhtlin a la awm lo hi a beidawnthlak tih a sawi a. “Kawng chhawng leh lei verh pawh kan chief minister hian a tuipui hle a, kan CM suangtuahna mipui hmaa a puan chhuah zung zung ang hi hlawhtling nghal zel thei se chuan Mizoram hi nasa taka hma kan sawn theih a rinawm,” a ti.
MPCC Treasurer hian, “Mau/raw chin duh zawk vanga IAS hna bansan an la awm lo mai ni loin, tun kum li chhung hian mau/raw hmun nei thar leh tuipui thar pawh an awm hriat a ni lo,” a ti a. ‘Aizawl chu traffic jam awm lohna khawpuiah kan siam dawn e,’ tia chief minister-in a sawi pawh Covid-19 len vanga inkharkhip puan a nih lai kha traffic jam awm lohna khawpui nih teuh ber lai nia sawiin, Congress sorkarin a Aizawl khawpui mil tawk two wheeler taxi permit an pek laiin, MNF sorkar chuan eizawnnaa hmangtute dinhmun en loin a sang tel permit an pe niin a sawi.
Zodintluanga Ralte hian a bial chhungah hmasawnna kawng hrang hranga an hmuh mek laiin tun kum li kalta chhung hian MNF sorkar atangin hmasawnna hmuh tur pakhatmah a awm loh thu a sawi a. “MNF sorkarin hmasawnna ruhrel a hluihhlawn tawh tam tak zingah Tuirial HEP pawh Congress sorkarin a din tha leh vek a. Falkawn Referral Hospital ar vulhna atan tea an hman mai mai tawh pawh, medical college hialah a hlang kai a. Sport lamah hmasawnna nasa tak a thlen bawk. Chutih laiin, tihdik tawk loh pawh tam tak kan nei ve thei a, chung kan thil tih dik tawk loah te chuan Mizoram mipui hnenah ngaihdam ka dil a ni,” a ti.