Aizawl : Mizorama a hmasa ber tur, Integrated Industrial Promotion Centre (IIPC) dinna tur lungphum chu thawhtanni khan Commerce & Industries Minister Dr R. Lalthangliana’n Hnahthial Electric Vengah a phum.
Dr R. Lalthangliana chuan, IIPC Hnahthial kaltlangin handloom leh industry dangte siam chhuaha, hralhchhuah thin anih dawn thu sawiin, Centre atang hian Border Haat, Thingsai leh ICP, Kawrpuichhuah kaltlangin kuthnathawktute tharchhuah leh industry te siamchhuah ram dangah thawn chhuah thin a ni dawn tih a sawi a, IIPC Hnahthial hlawhtling taka din anih theih nan ruahmanna te lo tawiawma sawrkar lo finchhuah thin turin Hnahthial mipuite a sawm.
Commerce & Industries Minister chuan, hnahthial District-a hmasawnna hna kal mekte sawilangin, Pangzawlah solar water supply scheme cheng vaibelchhe 17 sengin kalpui mek a nih thute, Mizoram chhim lam inkalpawhna atana pawimawh tak Tuipui D lei siam tha turin hmalakna kalpui mek a nih thu leh tun dinhmunah Revenue Department atangin clearance nghah mek a nih thu a sawi a, hemi bakah hian sawrkar Department-te tha tih chak nan Department hrang hrang office leh ruhrel dang sak hna kalpui mek zel a nih thu a sawi.
Commerce & Industries Director Florence Zotluangpuii’n IIPC Hnahthial sak tur chungchang sawia a tarlan danin, cheng nuai 846 senna tura ruahman IIPC building ah hian basement, ground floor leh 1st floor a awm dawn a, Guest room pali (4), chowkidar room, motor pasarih (7) lenna parking, mi 250 lenna auditorium, green room, cafetaria, expo stalls engemzawzat a awm dawn a, Expo leh Exhibition lian tham te pawh he building ah hian a neih theih dawn a ni.
IIPC dinna tur lungphum phumna puala inkhawm buatsaihah hian HPC Vice Chairman Lawmawma Tochhawng pawhin thu a sawi a, district thuneitute’n thu an sawi bawk.