India khawthlang lam, Gujarat-a sorkar thar siam tur thlanna neih tur boruak a sang zel a, thawh hniha vote thlak tur hi Ningani hian tan a ni dawna, ngaihdan lakah BJP chu chak ngei tura ngaih a ni a, a chhan lian berah Prime Minister Narendra Modi-a huhang puh a ni.
Survey neih chinah chuan Prime Minister Modi-a BJP chu bial 182 awmah a zawna vawi sarih nan an chak leh ngei dawn niin a lang a, eptu party lian ber, Congress party leh tun inthlana hmel thar, Aam Aadmi Party (AAP) an hneh dawn a. Result hi December 8-ah puan a ni ang.
Mi thiamte chuan BJP an chak chhan ber tur chu Modi-a’n voter-te anmahni vote tura a sawmna chuan a thawh that vang niin an ngai.
“Modi-a hi icon ani a, Hindu hriday samrat (Hindu thinlunga lal) a nihna hmel hian vote a hui nasa a ni,” tiin political scientist Ghanshyam Shah chuan a sawi.
Gujarat hi prime minister nen hian inkungkaihna thuk tak an nei a. Modi-a hi kum 2002 atang khan kum 12 chhung zet chief minister a lo ni tawh a, Hindu nationalism nghet taka tuhin hmasawnna pawh a thlen nasa a, he state atang hian ram pum huapa hman zui policy pawh a duang nasa hle.
Inthlan lo awm tur atana BJP-in hmatheh bera Modi-a an nei pawh thil mak a ni lo.
“I chhuah a nih chuan card remkhawm phelh ang maiin a darh huk ang,” tiin political analyst Achyut Yagnik chuan a sawi.
Gujarat Chief Minister Bhupendra Patel-a hi Modi-a’n kum 2014-a prime minister ni tura a kalsan hnua chief minister pathumna a ni a. Modi-a hminga vote a zawn bakah BJP candidate dangte tan pawh hetiang bawk hian a ti bawk.
Modi-a hi mipuia a tlak nat em avangin inthlan hma thla khat leka Morbi district-a lei chima mi 135 zet an thihna pawhin BJP boruak hi a hliah zo lo nia ngaih a ni.
Tun inthlanah hian AAP-in an chuh ve tan a. Survey neihah chuan BJP hawtute vote chu Congress leh AAP-ah a kal dawn nia ngaih a ni a, hei hian rorel lai party hi kum 2002-a bial 187-a bial 127 zet laa an chak chian ber tum ai pawha bial an lak tam zawk rinna pawh a awm hial a ni.
November 4-a polling agency C-Voter-in survey an neihah chuan BJP hian bial 131-139 vel an lak rin a ni a, Congress-in bial 31-39 leh AAP-in bial 7-15 an lak rin a ni a. Survey dang thenkhatah erawh bial 115 leh 125 inkar vel la turin BJP hi an dah.
Inthlan hnai zelin party lian pathumte hian mipuite rilru hmin tumin theihtawp an chhuah hlawm.
Congress chuan AAP chu ‘vote dangtu’ tia sawiin party lian pahnih awm thinah an karah an inrawlh ve mai niin an sawi.
AAP pawhin Congress hi BJP-in kum 1995-a a vawi khat nana thuneihna an chan hnua ‘ro an rel sual’ chhunzawmtu tur mai niin an puh ve bawk.
BJP President JP Nadda chuan an elpui party pahnihin an tiamte chu BJP tichaktu tur mai an nih thu a sawi ve bawk a. Nadda hian kartawp khan an party manifesto a tlangzarh nghe nghe.
Gujarat state mi tho, Union Home Minister Amit Shah pawhin BJP tan nasa taka campaign-in an party chuan ‘record awm sa zawng zawng khumin’ hnehna chiang tak an chang dawn tih a sawi.