Aizawl: Tarpho khuaa Food Civil Supplies & Consumer Affairs Deptt Godown & Related Infrastructures building chu vawiin khan bialtu MLA leh Minister ni bawk, Dr. R.Lalthangliana’n hawngin building satu Babie Construction & Consultancy Services chuan sorkar kutah an hlan nghal.
Minister chuan a bial chhungah Godown thar hawn theih a ni chu FCS&CA Deptt chungah lawmthu a sawi a, “Sorkarin mipuite tana hmasawnna ruhrel a dinte hi a chhawr tangkaitu mipuiten neitu rilru puin uluk leh tha taka an enkawl a ngai a ni,” tiin Covid-in kum hnih leh a chanve dawn a tihbuai avanga sorkar sum harsat thu te, vawkpul hri leh ramri buaina hmachhawn Myanmar buaina avanga raltlante buaipui an ngaih thu leh Bangladesh atanga raltlante buaipui a tul thu sawiin duh leh beisei anga hmasawnna kalpui chak theih a nih lohnaah mipuite chu hrethiam turin a chah.
Tarpho, Khawhri leh Aithur khuate tana Buhfai chhekkhawlna hi NABARD Warehousing Scheme hnuaiah Rs. 1,70,68,972 sengin sak a ni a, buhfai quintal 2,000 lenna tur godown, storekeeper pahnih chenna tur building, toilet pahnih leh kawtzawl PCC flooring te chu sak leh siam a ni
He hun hi Carolyn LB.Khiangte, DCSO, Lunglei kaihhruaiin Tarpho VCP Lalchangliana chuan sorkarin an mamawh tak godown a saksak chu mipuite an lawmthu sawiin January, 2023 atang chuan godown thar atang buhfai khulchhuah an beisei thu leh an ngen thu a sawi