An tum ram thleng turin Argentina beiseina a la nung a. Netherlands nen inkhel boruak sang leh hmuhnawm takah an inhnehtawk hnuah penalty shootout hmangin an chak.
Zirtawpni zana Lusail Iconic Stadium a inkhelah Argentina tan thiampuipa Lionel Messi bawk a par vul. Tun World Cup a khawvela player tha ber a nihna a nemnghet nia mi tam takin an sawi Messi hian minute 10-naah Nahuel Molina goal khung tur a siamsak a. Minute 73-naah penalty atangin an goal hnihna a khung.
Dinhmun tha a ding Argentina in inrintawkna nen football an khel. Mahse Netherlands an insiamrem.
Skill-ah an pha lo tih hria in ‘physical football’ khelh an tum. Louis van Gaal-a’n striker palian pahnih Luuk de Jong leh Wout Weghorst te dah lutin ball an vawrh a. Minute 83-na leh added time minute 11-naah a rah sengin Weghorst-a’n goal a khung.
Argentina an talbuai hman a, tharuma an ngam loh an khingpuite inkhelh danah an lawm lo, mahse football-ah a thiang vek si.
Ram pahnihte hi inelna liana hnuhma nei hnem tawh an ni a, hei hian inkhel boruak a tisang. An inkhelh chhungin yellow card vawi 17 phawrh a ngai a, Dutch defender Denzel Dumfries hnawhchhuah a ni bawk.
Penalty hmanga chak zawk zawnnaah Argentina keeper Emi Martinez chu an ram chakna lian tak a ni a. Virgil van Dijk leh Steven Berghuis te pet a save sak.
Lehlamah Enzo Fernandez chuan pet goal lo mahse Lautaro Martinez-a’n chakna penalty a khung a. Croatia nen final luh an inchuh ang.
Argentina coach Lionel Scaloni chuan, “Inkhel boruak a sang a, mahse quarter-final a ni miau. Kan rin loh dan ang deuhin an rawn inkhel a, mahse team tin, coach tin in khelh duhdan an nei vek.” tiin a thlirlet.