Chief minister thutthleng luahtu tur inchuhna boruak lian tak a awm karah Himachal Pradesh Congress chu an inching fel thei ta a. Pathianni khan Sukhvinder Singh Sukhu chu lak luh niin a thachhangdawltu atan Mukesh Agnihotri lak luh a ni bawk a. He inkhawmah hian Rahul Gandhi, Sonia Gandhi, leh Priyanka Gandhi Vadra te pawh an tel.
Ridge Maidan, Shimla-a inkhawm lian takah hian dawhsanah lal lo ni tawh thin leh chief minister vawi ruk lai ni tawh, Virbhadra Singh-a thlalak pawh lian taka tar lan a ni a, hruaitu kalkhawmten zahna chibai an buk hlawm.
Gandhi chhungkaw rual hian party president Mallikarjun Kharge pawh sorkar thar lak luhnaah hian a tel bawk.
Congress MP Gandhi-a chuan Virbhadra Singh thihsan tak, Pratibha Singh chu dawhsanah hian a kuah a. Singh-i hi chief minister nih tum ve zinga mi a ni a, party roreltu sangten an thlang ta lo thung.
An state inthlan chu a pasal thi ta hminga beiin hnehna an chang tih a sawi a, an chhungkua chu hlamchhiah leh si an nih chuan ‘chhiatna’ a nih tur thu a sawi hial.
Hetih mek lai hian tun inthlana MLA an neih thar 40-te zingah a tla na lem lo va, hei hi chanvo sang ber chang tura thlan chhuah a nih loh chhan nia sawi a ni.
Gandhi chhungkua nena an inchibai hi Singh-i thlawptute tan inremna lantirnaa ngaih a ni a. A thlawptute hi an party central observer-te thlenna khualbukah kalin amah an duh thu an aupui a. Observer zinga mi, Chhattisgarh Chief Minister Bhupesh Baghel-a car pawh an thutkhawmna a pan tur kawngah an lo dang bawk.
Himachal Pradesh assembly term liam chiaha eptu leader, Agnihotri-a deputy chief minister a ni tur hi an state-a a vawi khatna tur a ni a, Congress hian chanvo insemzai an duh vanga an tih nia ngaih a ni.
Agnihotri hi Singh-i lamtang niin chief minister nihtir ngei pawh tumtu zinga mi a ni.
Tun tum Himachal inthlana hnehna an chang hi All India Congress Committee (AICC) General Secretary Priyanka Gandhi-in campaign beihpui a thlak tawhnaa hnehna a chan hmasak ber a ni a. Kumin kumtirah khan Uttar Pradesh-ah theihtawp chhuah mah se hnehna an lo chang zo lo tawh.
December 8-a assembly inthlan vote tlate chhiarah khan Congress hian BJP paih thlain bial 68 awmah bial 40-ah hnehna an chang a. An candidate chakte hi an chakna a lian lo hlawm hle thung a, bial 15-ah phei chuan vote 2,000 aia tlemin an chak hlawm.
Congress-in bial 40 an lak laiin BJP chuan bial 25 an la a; mahse, vote tla an inhmuh tam hleihna chu 0.90% chauh a ni.