Aizawl: Mizoram Youth Commission hnuaia ‘Youth Centre’ chu Mizoram New Capital Complex (MINECO), Khatla-ah nimin khan Labour, Employment,Skill Development & Entrepreneurship Minister Lalchhandama Ralte-in a hawng.
Khuallian chuan hun reilote chhungin ‘Thalaite Inpui’ sak zawh a ni chu lawmawm tiin thalaite tan thiamna tak tak an chharna hmun nih ngei a beisei thu a sawi a. MYC chu 2008-a din chauh ni mah sela thalaite tana an hmalakna chu fakawm a ti a, “State dangte zingah youth commission mumal taka din leh kalpui an tam loh laiin Mizoram chuan tha takin a kalpui thei zel a ni,” a ti.
MYC chuan hmathlir fel tak neiin thalaite tan khawvel nuam zawk siamin hma a la mek zel a, zirna chauh ni lovin sumdawnna, infiamna leh eizawnna tlak tling nei thei turin training a kalpui thin a, a rah chhuah tha hmuh mek zel a nih thu a sawi.
LESDE minister chuan, “Ram leh hnam hmasawnna leh intodelhna turin thalaite an pawimawh takzet a, an hnena thiamna leh ngaihtuahna thar pek hi MYC tum ber a ni,” a ti. MYC kaltlanga Mizoram sorkar hmalakna hrang hrangte tihhlawhtling turin thalaite chuan MYC chu thiam leh tangkai taka hmang turin a chah nghal.
Mizote chu hnam ropui tak, theihna sang tak nei an nih thu sawiin, khawvel hriata Mizo hnam chawisang leh chawimawi turin Mizo thalaite chu ‘Youth Center’ hi hmang tangkai turin a sawm a ni.
MYC Chairman Dr. Vanlaltanpuia pawhin thu sawiin, “Youth Center hawn tak chuan Mizoram sorkarin thalaite a ngaihtuahzia a tilang chiang hle a ni,” a ti a. Youth Center hi Aizawl bakah hian Lunglei leh Serchhipah hawng leh tura ruahman mek a nih thu a sawi.
MYC kaltlangin coaching centre hi Mizoram district panga – Aizawl, Lunglei, Champhai, Kolasib leh Siaha-ah hawn tawh a nih thu leh UPSC leh Staff Selection Commission Exam hmachhawn tumten tangkai taka an hmang mek thu a tar lang bawk.
Vice Chairman, Agriculture Development Board H. Biakzaua leh Vice Chairman, Commerce & Indusatrial Development Board K. Laldawngliana te pawhin thu an sawi.
Vawiina Youth Centre hawn tak hi chhawng nga niin Gym Room, Badminton Hall, Store Room, Chowkidar Room, Coaching classroom leh mikhual room te awmin cheng vbc. 5 senga sak a ni.