Azl: Bangladesh tualchhung buaina avanga an sahimna zawnga Lawngtlai district Parva-III khuaa Bangladesh aţanga raltlan 310 awm mek te chu hmun dangah sem darh an ni dawn.
Thudawn danin, December ni 8, 2022 khan raltlante chungchang ngaihtuahin Lawngtlai Bawrhsap mawhphurhna la mektu Marilyn Rualzakhumi hovin district disaster management authority an ţhukhawm a, ruahmanna an siam dan chuan raltlante chu LADC huam chhung khaw hrang hrangah vawiin leh naktukah sawn chhuah tur a ni.
Tuithumhnar leh a bulhnai khuaah chhungkaw 30 dah an ni ang a. Chhungkaw 20 chu Vaţhuampui-ah dah chhungkaw 14 chu Chamdur project-ah dah an ni ang a, chhungkaw 10 chu Mautlang khua-ah dah an ni ang.
Raltlante sawn chhuahna tur lirthei chu BSF mite’n an ruahman ang a. Chawngte SDO (Civil) chuan Parva-III a raltlan chhawmdawlna awmte enfiahin an insawnna tur hmunah an mamawh tur angte a suan bawk ang. Parva a tlawmngai pawlte chu hetianga raltlan sawn chhuah a nih dan tur hi hriattir an ni ang.
An insawnna tur khua a VCP leh tlawmngai pawlte chu raltlante lo hmuak turin ngen an ni bawk. An insawnna tura VCP leh Young Lai Association (YMA) hruaitute chu Village Level Committee on Bangladeshi Asylum Seekers din ţheuh tura hriattir an ni.
Hetihlai hian Parva III khuaa raltlan awm mekte chuan High School tlangah an awmna tur hmun tunlai hian an sa mek a ni.