Ukraine chhim lam chu khawi lam ve ve atang pawhin nasa taka kah a ni a. Russia-in drone hmanga Odesa a beih laiin Kyiv pawhin Melitopol lak let tumin thapui a thawh thar leh.
Ukrainian sipaite chuan Inrinni khan drone 10 an kah thlak thu an sawi a, panga erawh chuan energy hmunpui fuhin mi maktaduai 1.5 velin power an neih loh phah tih an sawi.
A hnuah Melitopol mayor tlanchhe mek chuan Russian-te awp mek khawpui hi kah a nih thu a sawi veleh.
Russian sorkarin thuneihna chelh tura a dahte pawhin thlalak thehdarhin kangmei lian tak a chhuak tih a hmuh theih bawk.
Russia-in drone hmanga Ukrainian lawngchawlhna khawpui, Odesa kah nan hian Moscow hian Iranian siam drone an hmang niin Ukrainian thuneitute chuan an sawi.
“Odesa region-a dinhmun hi a khirh rih hle,” tiin President Volodymyr Zelensky chuan zana thuchah a sawiah a sawi lang a. “An kah fuh lai tak hi a buaithlak lai a ni a, electric siam tha leh turin hun a duh deuh dawn a, darkar mai ni lovin ni rei vak lo a ngai ang,” a ti.
October atang khan Moscow hian Ukraine-a energy hmunte a bitum nasa hle a, missile leh drone strike hmangin a bei nasa.
Melitopol-ah hian Moscow lamtang thuneitute chuan missile-a beih an tawhah mi pahnih an thih thu an sawi a. Mayor bi bo mek, Ivan Fedorov erawh chuan ‘anmahni rûntu’ thahnem tak an thi tih a sawi ve thung.
“Missile pahnihin air defence system a tichhia a, paliin a tum a fuh hlawm,” tiin Moscow-in an awp lai, Zaporizhzhia region-a governor atana a dah, Yevgeny Balitsky chuan Telegram messaging app-ah a sawi.
Ukrainian-ten Himars missile hmanga an kahnaah hian miin zanriah ei nana an hman, ‘recreation centre’ a tichhe niin a sawi bawk.
March thla atanga Russia-in a awp, Melitopol hi chhim lamah chuan Moscow invenna hmun pawimawh ber a nih thu President Zelensky-a adviser, Oleksiy Arestovych chuan a sawi.
“Russian sipaiten khawchhak lama Kherson region hmun thenkhat leh Russian ramri, Mariupol bul vela hmanrua leh pawimawh an lak kualna zawng zawng hi he khawpui kaltlanga tih hi a ni,” tiin Arestovych chuan social media-a an kawmnaah a sawi.
“Melitopol hi an chân a nih chuan Kherson pan theihna zawng zawngah an tluchhia tihna a ni ang a. Ukrainian sipaiten Crimea panna kawng pawh an hnaih sawt ang,” a ti.