World Cup final luh tuma inhmachhawn turte an chiang tawh. Nilaini zan semi-final inkhelah Morocco leh champion lai France an inkhel dawn.
Morocco in Africa khawmualpui atanga World Cup semi-final khel hmasa ber ram ni turin champion tura rinkai zing ami Portugal 1-0 in an barakhaih a. Player nei tha ram ve ve inkhelah champion lai France in 2-1 in England an hneh.
Sakeibaknei an nung
Group F atanga an tling thei in fak a hlawh tawh a. Belgium leh Canada te chunga an awm hnuah round of 16-ah Spain lakah an chak tawh.
Morocco in tanrual an chakpui thin a. ‘The Atlas Lions’ tia hminglem an vuahte hian fiahna hautak ber mai Inrinni zanah Al Thumama Stadium-ah an hmachhawn.
Africa hmar lama awm ram atangin an fans te an pungkhawm hnem a, ram pahnihte inkhel han thlir chuan player malkhai a neitha zawk an hriat.
Portugal in an football hlauhawm khelh an tum a, mahse fakawm takin Morocco an inveng.
Minute 42-naah erawh beisei loh a thleng. Yahya Attiyat-Allah chuan beisei nei sang takin ball a vawrh lut ‘risk’ a, striker Youssef En-Nesyri a hmu fuh.
Portugal goalkeeper Diogo Costa a chesual, ball kal a hisap sual a, ball kang a hlauhawm En-Nesyri chuan tauh khalhin a goal ta daih.
Portugal barakhaih in an awm a. Second half-ah ram tana a vawi 196 inkhelhna turin Cristiano Ronaldo an dah lut chungin awmzia a awm lo.
Huntawp dawnah striker Walid Cheddira hnawhchhuah a ni chung pawhin Portugal in an si phurh an sut thei lova. Mittui nen Portugal an haw.
Morocco head coach Walid Regragui chuan, “Portugal team ropui kan hmachhawn a, kan theihna zawng zawng kan hlan. Tunah hian kan team-ah player inhliamte pawh kan la nei nual. Kan inkhelh hma khan Africa tan chanchin ropui kan ziah a ngai tih ka hrilh a. Kan hlawhtling thei hi ka hlim hle.” tiin inkhel zawhah a thlirlet.
England in France an umpha thei lo
Inrinni zan inkhel hnuhnung zawkah Al Bayt Stadium-ah England in France an hmachhawn a. 2-1 in a tlawm zawkah an tang.
England tan captain Harry Kane-a penalty vawi hnihna khung loh a pawi a. Huntawp dawnah an huntha a bawhpelh.
France in goal khung turin minute 17 chauh an mamawh a, fimkhur takin England khel mahse midfielder beiseiawm Aurelien Tchouameni chuan meter 23 a hla atangin goal mawi a khung.
Si an phurh hnuah erawh England an khelchhe lo, team haluhawm zawk ni fovin Kane-a’n goal a khung teuh thei a. Minute 54-naah Bukayo Saka penalty hlawhchhuah chu goal-ah khungin England tana Wayne Rooney record siam a tluk chiah.
Mahse France in Olivier Giroud hmangin hma an hruai leh thuai a. Kane-a’n huntha a chhawr loh hnuah Les Blues an lawm.
Inkhel enkawltu referee in sawisel a hlawh zui a. France player-te chetdana foul ham loh a ngah niin an khingpuiten an ngai. France defender Theo Hernandez chu Mason Mount a foul avanga hnawhchhuah a ni lo a vannei hle.
France coach Didier Deschamps chuan, “A sang pali zinga tel leh theih hi thil lawmawm a ni. Penalty vawi hnih kan chawi avangin kan vannei tel hle niin ka ngai.” tiin a sawi zui.