Chelsea chuan Ukraine forward Mykhailo Mudryk chu Shakhtar Donetsk atangin an lalut fel.
Kum 22 mi hian Stamford Bridge-ah kum riat leh a chanve contract a ziak a. Blues in a manah Pound maktaduai 62 an pe dawn a, Pound maktaduai 27 an pek belh leh thei bawk ang.
Premier League hmahruaitu Arsenal in ngawrh taka an umzui tawh chu Chelsea in an lakluh khalh a. Tun season-ah Shakhtar tan league inkhel vawi 12 atangin goal sarih a khung tawh.
“Chelsea hi club lian a ni a, tuna ka football zinkawng zawhah helai hmunah an thil din tuma tel hi ka tan thil tha a ni.” tiin Mudryk chuan a sawi.
Tun thlaah Mudryk hi Chelsea in player an lakluh pangana a ni a. Joao Felix, Benoit Badiashile, David Datro Fofana leh Andrey Santos te a zui.