Italy a hmahruaitu ni lai Napoli in kuminah Serie A champion ni turin an buk an ti rit zual a. Anmahni hnaih bertu ni a bul tan Juventus lakah goal nga an khung.
Zirtawpni zanah Napoli in Stadio Diego Armando Maradona-ah Juventus an mikhual a. 5-1 a lo sawpin point 10 in league-ah hma an hruai.
Napoli tan winger Khvicha Kvaratskhelia a che tha fal a, minute 14-na a an goal hmahruai khungah pawimawhin a bicycle kick chu Juventus goalkeeper Wojciech Szczesny chuan save sak mahse Victor Osimhen-a’n ball per a tauh lut.
Osimhen-a’n minutue 39-naah Kvaratskhelia khung tur a siamsak ve leh a. Juve tan Angel di Maria chuan halftime hma in goal khat a khung ve bawk.
Second half-ah Napoli tho an langsar a, defender Amir Rrahmani chuan an goal thumna khungin Osimhen leh substitute Eljif Elmas ten an chhunzawm.
Napoli coach Luciano Spalletti chuan, “Kan kheltha a, football rang tak kan khel. Napoli khaw mipuiten min thlawp tlat a, kan inkhelhna boruak a nuam hle.” tiin a sawi.
Inrinni zanah champion lai AC Milan in goal hnih an chhuah hnuah Rafael Leão leh Davide Calabria te goal khung hmangin an sut a, Lecce nen 2-2 in an inhnehtawk.