Manchester United in an hmelma Manchester City lakah ‘comeback’ hnehna an chang a. Khaw khat club pahnihte inkhel ngaihven hlawh takah 2-1 in hnehna an chang.
Inrinni tlaiah Old Trafford-ah Manchester derby khelh a ni a. Nikum lama an inkhelh hmasak tum leh an season hman dan avangin ngaihven a hlawh a, boruak pawh a sang.
City in inkhel hun tam zawk chhung a khelchhe zawkah tang mahse minute 60-naah substitute Jack Grealish hmangin goal an khung a. Chak zawkah an tang mai dawn emaw an ti hman.
Nimahslea United in minute 12 hnuah goal sawi hlawh an khung. Bruno Fernandes goal khungah inrawlh ve lo mahse lo tlan ve Marcus Rashford chu a offside. Ball a khawih loh avangin England forward hian inhnamhnawihna a nei lo niin referee in a ngai a, goal-ah an pawm.
City player-te lawm lo mahse an tawrh belhchhah thuai. United substitute Alejandro Garnacho chuan Rashford-a chakna goal khung tur a siamsak zui a. United star hian a zawnin match 9 chhung Old Trafford-ah goal a khung tawh.
United leh City inkarah point khat chauh a awm tawh a, league hmahruaitu Arsenal tan result lawmawm a ni.
Hmasawnna a tam
Etihad Stadium-ah October thla a an inkhelhin goal ruk an chhuah. Erik ten Hag-a pawlte an tlawm chiang.
Dutch coach in zir tur an ngah thu a sawi, an inzir bawk. Inrinni zana an result avang hian inelna hrang hrangah vawi 19 inkhel tawhin vawi khat chiah tlawm an nei a. A sang pahnih an um ngawrh tawh.
An goal hmasa zawkin sawi hlawh mahse huntawp ham rik hma a team kheltha zawk chu United an ni chiang.
First half-ah United in chance tha an nei nual a. City football hlauhawm khel tur an veng tlat thei a. Grealish-a goal khung chu ‘shot on target’ an neih hmasak ber a nihna in City in nidang an ang lo tih a ti lang chiang.
Manchester United boss Erik ten Hag chuan, “First half kan kheltha hle a, kan inven that bakah huntha kan neihin kan hlauhawm thin. Second half-ah City an rawn nung a, keini kan insiamrem lo. Mahse he team inrintawkna leh beidawn duh lohna hi a lian a. Minute 90 chhungin kan tho leh thei a ni tih rinna lian tak a awm.” tiin a team a fak.
Liverpool an buai
Inrinni zana inkhel dangah Liverpool chet that a kal chho thei lova, tun season a team lian ngam tak Brighton & Hove Albion lakah 3-0 in an tlawm.
Amex Stadium-ah Brighton in Solly March goal hnih leh Danny Welbeck goal khung hmangin hnehna an chang a. Team tha zawk chiang taka ni in first half-ah penalty beiseina an nei a. Chance tha zawk nei thin pawh an ni.
Seagulls hian Liverpool hi tun season-ah an draw tawh hnuah an hneh leh a. Anni bakah Chelsea leh Manchester United pawh an hneh tawh.
Coach Roberto de Zerbi chuan, “Season tawp atan tum sang tak kan nei.” tiin a sawi zui.