Pathianni zana neih zawh tak Mis Universe 2022 thlannaah USA nula R’Bonney Gabriel a dingchhuak ta a, Miss Universe 2021 Indian nula Hamaaz Sandhu hnen atangin crown a rochun. Karnataka nula Divita Rai erawh Top-5 ah a lang zo lova, Indian beiseia a tawp zui.
New Orleans, Louisiana-a neihah hian fashion designer leh model ni bawk Gabriel hian nikum vek khan history lo siam tawhin, Filipino American zinga Miss USA ni hmasa ber record duhawm a nei.
Venezuela nula Amanda Dudarnel chu first runner-up niin, Dominican Republic aiawhtu Andrena Martnez chu second-runner a ni.
Ernest N. Morial Convention Center-ah hian mipui an pungkhawm hnem hle a, Miss Universe 2022 thlan thar Gabriel chuan organiser te chu kum bithliah titam hret turin a ngen.
“Ka tan chuan kum bithliah tihtam hret theih hi thil tha tak ni turah ka ngai a, tunah hian kum 28-na ka hmang mek. Hei hi kum bithliah an neihah phalchin a ni. A chhan chu, hmeichhia ka nih angin kum hian ka nihna a sawifiah lovin ka hria,” a ti.
Gabriel hi Houston, Texas-a piang leh seilian a ni a, a pa Remigio Bonzon ‘R.Bon’ Gabriel hi Flipino niin, anu Dana Walker erawh American a ni thung.
University of North Texas atangin thiamna a pawchhuak a, fashion design nena zirchhuak hi sik leh sa nena intuha tak silhfel lam siamna lamah hming a chher hle bawk.
Miss Universe 2022 thlanna ah hian khawvelpum arangin hmeichhia 86 chuan an inlan a, Indian nula Divita Rai pawh a tel.