Naga National Political Groups (NNPGs) leh National Socialist Council of Nagalim (NSCN) chuan Inrinni khan Naga-ten an hnam ang leh politics-a an chanvo dik tak an chan theihna tura sorkar laipui nawr turin ‘tiamkam nei lova bei’ turin an intiam a, hemi atan hian thawhhona pawl thar an din.
NNPG leh NSCN ten thuchhuah intawm an siamah, “Tun hnaia Naga movement kal mekah harsatna awmah Naga-te hi an dam khaw chhuak zel a. Vawiin hian kil inang lo atangin inthurualin nakin zela Naga-te hamthatna turin hma lakna tur ruahmanna siam a ni,” an ti.
An thuchhuahah hian ‘September Joint Accordant’ an lo siam tawh, September 14, 2022-a mi angin NNPG leh NSCN hian an thil tum chu a huhova chak zawka nawr nan ‘Council of Naga Relationships & Cooperation’ an din tih an tar lang bawk a ni.
CNRC hi NNPG convener leh NSCN chairman ten an kaihhruai dun tur a ni dawn a, ‘Naga-te chanvo leh chanpual hai chhuaha a hma thei ang bera tihlawhtlin a nih theih nana nawr, Naga-ten an hnam ang leh political-a an dikna chanvo an neih ngei theih nana beih’ chu an tum ber tur a ni.
“Hetiang dinhmun atang hian NNPG leh NSCN chuan he ni-ah hian kan lo inrem tawhna zulzuiin, tiamkam awm lova tan tlana awmze nei zawkin, Naga-te tan history leh politics-a dikna chanvo chu India sorkar atanga nawr chhuak turin kan inpe a ni,” tiin an thuchhuahah hian an tar lang bawk.
“Naga mite zawng zawngte pawh kan lamah tanga min thawhpuiin, nakin zelah pawh min tidarh thei thil awm apiang laka min venpui turin kan sawm cheu a ni,” an ti bawk.