Nepal ram lailia thlawhna tumhmun bul lawka mi 72 phur thlawhnaa tlaah mi eng emaw zat an thi.
Yeti Airlines thlawhna hi Kathmandu atanga khualzinte tlawh thin khua, Pokhara pan niin a tum dawnah tlain a kang zui a ni.
Social media-a video darhah chuan a tlak hma lawk hian mihring chen tamna lai chung zawnah hniam taka thlawkin a vir zui ta nawk nawk tih a hmuh theih.
Pathianni chhuna chetsualna thlenga thi zat hi chiang taka hrait theih a la ni lo va. Thuneitute chuan chawhnu lam khan mi 62 an thih thu leh ruang 29 vel an lak chhuah tawh thu an sawi.
Hliam tuarte pawh an dinhmun a tha lo hle a, rang taka damdawi in panpui an ni hlawm tih tual chhung mite chuan an sawi.
Thlawhnaah hian passenger 68 an chuang a, an zinga 15 vel chu ram dang mi niin thawktu pali an tel bawk.
A tlakna bul hnaia cheng, Deeveta Kal chuan van sang atanga a tla a hmuh hnu lawkah a hmun hi a thleng nghal tih BBC hnenah a sawi a. A tlak hun hi an ram sanaa chawhma dar 11:00 (India-a chawhma dar 10:45) hnu hret a ni.
“Mi an lo tam tawh hle a, thlawhna atang chuan mei khu dum tak a chhuak nguah nguah a, helicopter-te pawh a lo thleng thuai a ni,” a ti.
Seti River kam thuk laia chet sualna thlenna lai hi tumhmun atanga kilometre khat awrh chauh niin Nepalese sipai eng emaw zat an thleng zui nghal a ni.
A tlakna hmuna video lakah chuan mei khu nasa taka awmin thlawhna tla keh darhte chu a kang hluah hluah tih a hmuh theih.
“Ruang dang kan hmuh zel kan inbeisei,” tiin sipai thupuangtu chuan Reuters a hrilh a, thlawhna chu ‘a tla darh nasa’ tih a sawi bawk.
Prime Minister Pushpa Kamal Dahal chuan a cabinet member-te thutkhawm hmanhmawh a ko nghal a, sorkar hnuaia mite chu chhanchhuah hna thawk thuai thuai turin a ti a. A tlak dan chhui chiang tur panel din nghal a ni bawk.
Passenger zinga mi 53 chu Nepalese an ni tih sawi a ni a. Indian panga, Russian pali leh Korean pahnih an chuang bawk a. Ireland, Australia, Argentina leh France atanga zin pakhat theuh an tel bawk.