Philippines ramah kumin chhungin thlipui leh ruah sur nasa lutuk kaihhnawiha chhiatnaah mi 27 vel an thi tawh tih thuneituten an sawi a. Asia chhimchhak ramah hian khaw awm dan uchuak tak hmabak a la nei mek bawk.
Ruah sur nasa tak leh tui lianin Krismas bawr atang khan an ram chhim leh laili laia thliarkarte chu a tuam mek a, mi sang tam takin hmun him panin an in leh lo an chhuahsan phah.
Kum tir atanga hlawm thuma thawkin mi 27 a la tawh tih civil defence office chuan Pathiannia report a tihchhuahah an tar lang.
Mi 11-in hliam tuarin mi pathum chin hriat lohvin an la awm mek bawk.
An rama khawchin sawi lawktu, PAGASA chuan Pathianni khan Bicol Peninsula leh an thliarkar lian ber, chhim tawpa Quezon province-ah ruah tam tak a sur dawn tih an sawi lawk bawk.
“Hetiang dinhmunah chuan tui lian, ruah sur nasa kaihhnawiha lei min pawh a thleng thei reng a, thil hlauhawm leh inralrin ngai a ni,” tiin PAGASA chuan inrinna tur a tihchhuahah a tar lang a ni.
Evacuation centre-ah mi 83,000 chuang an khawsa mek niin civil defence office chuan a sawi a, chenna in 1,200 cuang tui lian leh ruah sur nasa avangin a chhe tawh.