Italy-a mafia boss man a duh ber, Matteo Messina Denaro chu kum 30 chhung zet man tuma zawn a nih hnuah Thawhtanni khan Sicily-ah man a ni.
Messina Denaro-a hi Sicily khawpui, Palermo-a mi mal damdawi inah man a ni a. Sicily-a pawl nunrawng tak, Cosa Nostra mafia-a an hotupa nia hriat a ni.
Italian chanchinbute chuan damdawi ina inenkawla a awm laiin, chawhma dar 10:00 (India-a chawhnu dar 2:30) velah man a nih thu a tar lang hlawm a. Carabirieni-a hmun biru takah lak nghal a ni a, a man tur hian ralthuam keng mi 100 chuang an thawk chhuak niin a tar lang bawk.
Messina Denaro-a hi court-ah a chungthu rel a ni ang a, tualthahna eng emaw zat avangin dam chhung tang tura hrem theih a ni ang.
Mi thahnaa a inhnamhnawihna an sawi zingah hian kum 1992-a mafia duh lotu prosecutor pahnih, Giovanni Falcone leh Paolo Borsellino thihna te; Milan, Florence leh Rome khawpuia kum 1993-a bomb puaka mi tam tak thihna te bakah mafia-tel thin pakhat, sorkar tana hriatpuitua tang zui ta fapa kum 11 mi ruk bo, nasa taka sawisak leh thah pawh a tel a ni.
Mafia boss sumdawnna bawlhhlawh tak tak dangah pawh a inhnamhnawih nasa nia puh a ni a. Phal lohva bawlhhlawh sawngbawl te, sum tihchingpen leh pawikhawihna chi hrang hrang thlentu Cosa Nostra hminga ruihhlo tawlh thinah pawh puh a ni.
Messina Denaro-a hi mafia-a peng (clan) pakhat, Corleone hotupa ber, Totò Riina thlazar hnuaia che vel thin nia hriat a ni a. Riina pawh hi kum 23 zet a biruk kual hnuah kum 1993 khan man a ni.
Kum 1993 atang khan Messina Denaro-a pawh hi man tuna zawn tan a ni a, biru kual char charin a birukna hmun hrang hrang atangin a hote thu a pe kual thin.
Italy Prime Minister Giorgio Meloni chuan ‘pawikhawihtu pawla an mi pawimawh tak’ mantu venhim hna thawktute hnenah lawm thu a sawi a. “Ram tan hlawhtlinna ropui tak a ni,” a ti.