Nikum chhung khan ruihhlo vangin Mizoramah mi 43 an thi a, kuminah ruihhlo avangin mi pathum an thi tawh bawk.
Mizoram Excise & Narcotics Department (END) chhinchhiah danin kum 2022 chhung khan Mizoramah ruihhlo avanga nunna chân mi 43 awmin, an zinga 39 chu mipa an ni a, mi pali chu hmeichhia an ni thung.
Nikum chhunga ruihhlo avanga thite chu heroin leh ruihhlo dang tikawp thinte an ni.
Kuminah January 1 atanga 13 thlengin Mizoramah ruihhlo avanga thi mi pathum an awm tawh a, heroin leh ruihhlo dang khawih kawp thin bawk an ni.
END-in ruihhlo vanga thi an chhinchhiah tan, kum 1984 atanga January 13, 2023 thleng khan Mizoramah ruihhlo avanga thi 1,736 an awm tawh a, an zinga 1,531 chu mipa niin, mi 205-te chu hmeichhia an ni thung.
Ruihhlo vanga thiten an thihpui tam ber chu proxyvon/parvon spas niin, mi 1,161-in an thihpui nia chhinchhiah a ni a. Heroin avanga thi 233 leh ruihhlo dang hrang hrang tih avanga thi 342 chhinchhiah an ni bawk.