I&PR Minister Lalruatkima’n district thar – Khawzawl, Hnahthial leh Saitual-ah DIPR office hawn phalna te, DC office building-a an awmna tur te sorkarin a buatsaih chho zel tih a sawi.
Information & Public Relations Deptt-a thawktute kumin atana inhlan tharna hun nimina a hmanpuinaah he thu hi I&PR minister chuan a sawi a. Serchhip district-a DIPR office pawh sorkara an dil angin sanction post-a hlan a nih thu a sawi.
Minister chuan PWD lamah pawh post thar an neih belh thu sawiin, Combined MPSC 2022 kaltlanga MIS post pali an neih belh pawh hmasawnna tha tak a nih thu a sawi a. Kum 2023 atan Mizoram Information Service post nga sorkarin a phalsak thu a sawi bawk.
Lalruatkima chuan ram rawngbawlna kawnga public relations pawimawhna sawiin, mipui leh sorkarin inlaichinna tha an neih theihna tura pawt hnaitu, leilawn dawhtu department an nih thu a sawi a. Thahnemngai taka thawka tang nasa leh zual turin thawktute chu a chah.
I&PR minister chuan kum 2020 March atanga COVID-19 avanga harsatna a thlen atangin I&PR department chu a hma zawng aiin an buai zawk nia sawiin, khuarel chhiatna a thlen changtea mipuite thu dik hrilhhriat hna an thawhna kawngah thawktuten an thawk tha tiin lawmthu a sawi a. Social media lama thu dik tawk lo a darh chak em em laiin, mipui hnena thu dik puanzar kawnga tan an lak thu leh social media hrang hrangte pawh a tha zawnga an hman tangkai avanga lawmawm a tih thu a sawi bawk.