Kum tam tak chhunga Nepal-a thlawhna tla rapthlak ber thlengah mi zawn hna thawktute chuan dama lak chhuah tur an awm an beisei tawh lo.
Tual chhung thuneitu, Tek Bahadur chuan mihring dam hmuh beiseina chu ‘a tawp tawh’ tih a sawi a. Thlawhna flight data leh voice recorder erawh hmuh a nih thu a sawi.
Kathmandu atanga khualzinte tlawh tam khua, Pokhara pana thlawk, Yeti Airlines thlawhna, mi 72 chuanna hi Pathianni chawhma khan a tla a ni.
Tawhsual a tawh chhan hi hriat a la ni lo.
Taksi district-a Chief District Officer Bahadur chuan, “Ruang 68 kan la chhuak tawh a, pali dang zawn leh mek a ni,” a ti.
Yeti Airlines thlawhna chesual hi kum 30 chhunga Nepal-a thlawhna tlaa thi a tam ber tum a ni.
Mobile phone hmanga video lak pakhatah chuan thlawhna hi a tlak hma lawk hian boruakah a vir nasa a, a tumna tur tumhmun a thlen hma kilometre khat chuang awrha Seti River kawr ruam thukah a tla lut ta a ni.
Thlawhnaah hian passenger leh thawktu mi 72 an chuang a ni.
Thawhtanniah khan thawktu mi 300 chuangin thlawhna ruangruh kang bâng karah hna an thawh chhunzawm.
Nepal prime minister chuan Thawhtanni kha ram pumah sunna ni atan a puang a, sorkarin thil thlen dan kimchang chhui tur panel a din tawh bawk.
Tual chhung mi pakhat, Divya Dhakal-i chuan an ram sanaa chawhma dar 11:00 (India-a chawhma dar 11:45) pelh hreta van sang atanga thlawhna bir thla a hmuh chuan an tlakna hmun a pan ve vat thu BBC hnenah a sawi.
“Ka thlen ve chuan mi an lo tam tawh hle a. Thlawhna atang chuan meikhu a chhuak hluah hluah a, helicopter pawh a lo thleng zui a ni,” a ti.
“A khalhtu khan chenna in su lo turin theihtawp a chhuah a. Seti River sir hretah hmun awl zim tê a awm a, chulaiah chiah chuan a su a ni,” a ti bawk.
Yeti Airlines thlawhna tla ta hian chawhma dar 10:30-ah Kathmandu chhuahsanin zinkawng tawi tê zawha Pokhara thleng mai tura ngaih a ni.
A chuang zinga mi 68 chu passenger niin ram dang mi 15 an tel a, a bak 53 chu Nepali an ni a. Ram dang mite hi Indian panga, Russian pali, Korean pahnih leh Ireland, Australia, Argentina leh France mi pakhat theuh an ni.
Nepal ramah hian thlawhna tumhmun kilkhawr tak tak te a tam avang leh khaw awm dan inthlak thut thut a tam hle a, hei vang hian thlawhna chesual pawh a awm fo.
Himalaya tlangdunga awm a ni a, khawvela tlang sang ber ber awmna a nih avangin thlen chin leh kawng chin bo leh hai pawh an awl hle.
Tun hma lama chetsualna thleng tawh thinah chuan thlawhna hlui tawh leh enkawl that loh bakah thuneituten himna dan zam an kenkawh that tawk lohte puh a lo ni tawh thin.
European Union phei chuan Nepal rama airline-te hi training leh enkawlna a that loh avangin an chung boruaka thlawh a khap hial.
May, 2022 khan Tara Airlines thlawhna chu Nepal hmar lamah chesualin mi 22 an thi a. A hma kum li-ah khan Bangladesh atanga thlawk chu Kathmandu-a a tumnaah nasa taka kangin min 51 an lo thi tawh bawk.