Vawi kua champion tawh Novaj Djokovic chuan Australian Open-ah chiang taka changin a kir leh a. First round inkhelah Roberto Carballes Baena chu straight set in a hneh.
Kum 35 mi hian mipa tennis record ni lai tluk tumin Grand Slam title 22-na lak a tum a. A khingpui hi 6-3 6-4 6-0 a hnehin bul a tan.
Serbian star hi Rod Laver Arena-ah mipui lawm a hlawh hle a. Nikum lamah Covid 19 lakah inkhuahkhirhna a nihlaiin Covid 19 vaccine a lak duh loh avangin Australia atanga thawn haw a ni a, a inkhel thei tawh lo.
Second round-ah hian Hugo Dellien leh Enzo Couacaud inkhela chak zawk a hmachhawn leh ang.
Djokovic hian world number 75 Carballes Baena hneh tur hian darkar hnih leh tlem bak a mamawh lo.
Australian Open inbuatsaihna tournament Adelaide a neihah champion mahse Djokovic hian a malah tihrawl hliam tenau neiin tournament hi a hmachhawn a. A ke veilam chhah tama tuam chungin a inkhel.
Nimahsela inkhelah erawh harsatna a nei lo tih a lang chiang a. Set hmasa ber game nga naah break point vawi thum a khingpui in a neih chu a dang vek a. Hemi hnu lamah hian harsatna a nei tawh lo.
Djokovic hi Australian Open-ah record a nei ropui a, a zawnin match 35 chak lai a ni.
“Australia a ka inkhel leh thei hi ka lawm a, ka tennis khelh chhunga ka hlawhtlinna ber hmun a ka inkhel leh thei hi ka lawm. He court hi ka tana hlu ber a ni a. Tournament bul ka tan dan pawh ka duhthusam a ni.” a ti.
Murray-a’n Berrettini a barakhaih
British veteran Andy Murray chuan tunhnaiah tennis inkhel a hmachhawn tawha a khelh that ber tum a hmang a. Seeded number 13 hauhtu Matteo Berrettini chu set nga inkhel hmuhnawmah barakhaihin second round a lut.
Kum 35 mi hian 6-3 6-3 4-6 6-7 (7-9) 7-6 (10-6) in Rod Laver Arena-ah a khingpui hi a hneh.
Murray hi kum 2019 khan a kawng hliam zai a nih hnuah a tennis hun a tawp dawn niin amah ngei pawhin a ngai a. Tunhnaiah inkhel lehin a kir leh hnua a result lian ber a nei.
Hnehna nen Zverev a kir
German tennis star Alexander Zverev chuan June thla a a khup hliam zai a nih hnua singles inelna a khelh leh hmasak berah hnehna a chang a. Set nga inkhelah Juan Pablo Varillas a hneh.
Zverev hi French Open semi-final hnuah inhliam avangin a la inkhel mumal leh lova. Varillas lakah hian 4-6 6-1 5-7 7-6 (7-3) 6-4 in a chak.
Kum 25 mi hian December thla khan inelna pangngai ni lo exhibition match a khel leh thei tan chauh a ni.
“Eng pawh thleng se, he hnehna ka chan avang hian tun tournament hi ka tan chuan tournament hlawhtling a ni tawh.” tiin Zverev chuan a chak hnuah a sawi.