Premier League club Nottingham Forest chuan tun season a player an lakluh 24-na ni turin Brazilian midfielder Danilo chu Palmeiras atangin Pound maktaduai 16 vel bawrin an lalut.
Kum 21 mi hian league table a 13-na a awm mek hnenah hian kum ruk leh a chanve contract a ziak.
Defensive midfielder thahrui ngah leh team tana thawkrim thin tak Danilo hian kum 17 mi a nihin Palmeiras hi zawmin an hnenah professional football a khel tan a. Kum 2020 September khan senior team tan khel tanin an tan vawi 141 a inkhel tawh.
Palmeiras in 2022 Brazilian Serie A title an lakna kawngah a pawimawh hle a. Copa Libertadores title vawi hnih a la tawh bawk.
“Bul tan a, ka teammate tharte hmelhriat hlan ka nghakhlel tawh hle. Chak duhna lian tak leh tumruhna ka lantir dawn a, khelmual chhungah result tha kan neihna turin ka theihtawp ka chhuah zel ang.”
“Premier League a khelh ka chak thin chu a tak ramah a chang dawn a, Nottingham Forest tana ka khel tur hi ka lawm hle. He club chanchin hi ka lo zir a, European Cup vawi hnih chawi tawh an nihte pawh ka lo hria.” Danilo chuan a ti.