Afghan Disaster Management Ministry chuan tun hnaia a ram thlasik khaw vawt uchuak takah mi 70 vel leh ran vulh tam tak an thih thu an sawi.
Ministry chuan chawlhkar khat liam ta chhungin mihring 70 vel leh ran vulh 70,000 vel an thih thu Nilaini khan a puang.
Chawlhkar hnih liam ta atang khan Afghanistan-ah hian a province eng emaw zat chu khaw vawt uchuak takin a tuam a, ram lailia Ghor province hmun thenkhat phei chu -33C laia vawt a ni.
Meteorology pisaa an hotu ber, Mohammad Nasim Muradi chuan, “Tun tum thlasik hi kum tam tak chhunga a vawh ber tum a ni,” a ti.
“Khaw vawt uchuak tak hi chawlhkar khat đang a la nih chhunzawm a rinawm a, chu aia rei pawh a la ni thei,” a ti bawk.
Islamic Emirate of Afghanistan thupuangtu, Zabiullah Mujahid chuan khaw vawt lutuk avanga thi chhungte a tawrpui tak zet thu a sawi.
“Province thenkhatah khaw vawt lutuk avangin kan khua leh tui eng emaw zatin nunna an chân tih han hriat hian mi a tihrehawm hle a ni,” tiin Mujahid hian Twitter-ah a tar lang.
A tuartu chhungkuate pui tur leh thi an awm belh lohna tura tih theih ang ang ti turin agency leh sorkar hotute chu che chhuak tura tih an nih thu a tar lang bawk.
Social media-a thlalak leh video darhah chuan Afghanistan laili leh hmar lam province-ah te chuan vur tla nasain kawngpui a dante pawh hmuh tur a awm.
Tun tum thlasik hi August, 2021-a US-in a inthiar chhuahsan hnuah Afghanistan-in thlasik a tawrh vawi hnihna a ni a. Thlasik hma pawhin he ramah hian retheihnain mipui a tuam nasa a, mi maktaduai 38 cheng zinga a zahve aia tam hi ei tur khamkhawp nei lo an ni sa a. Khawthlang ramten an hrekna leh ram dangten rorelna fawng chelh mektu, Taliban-te an pawm duh lohna chuan an harsatna a belhchhah zual bawk.
Thla hmasa tanpui hna thawka awm tlawmngai pawl hrang hrang chuan Taliban sorkarin hriselna lam kaihhnawih tih lohva hmeichhiate hnathawh a khapsak duh loh lantir nan hna an lo chawlhsan tawh a. Taliban hian hmeichhiate hi sikul leh university an kai an khap bawk.
Thawhlehni khan agency hrang hrangte chuan Taliban-in hmeichhiate hna thawh a phalsak chuan anni pawhin an hna an chhunzawm veleh nghal tur thu an sawi.