India-a state pakhat minister-in sakei suat chungchang a sawi chuan sawi a hlawh hle.
Kerala Wildlife Minister AK Saseendran hian an state-a sakei tam lutuk tihtlem nan tihchin emaw, suat emaw, khawi zawk nge tha ang tih ngaihtuahna an nei mek tih a sawi a ni.
He thil hi sakeiin a beih avanga lo neitu pakhat thihna thleng a sawinaa a sawi chhuah a ni.
Minister hian a hnenah sakei suat chu tual chhung mi thenkhatte hnen atanga thurawn a dawn a sawi chhuah a nih thu BBC a hrilh.
Ramsa humhalh duhna a awm laia hetiang a sawi ta mai chungchangah hian thil dang erawh a sawi zui duh lo va, hetih lai hian mi tam tak chuan suat chu ‘dan lo hulhual’ a nih thu sawiin an thinrim hlawm hle.
India hi khawvela sakei awm zawng zawng zinga 70% vel zet awmna niin tun hnaia sorkar chhinchhiahna tharah chuan 2,976 an awm a. An pun zel laiin an awmna thin chin a zauh belh ve tawh si lo va, an tama ram humhalh chin pela kalin mihring nena inkarah harsatna a thleng ta fo a ni.
Sorkar laipuiin kum 1972-a wildlife protection law a siam tharah chuan sakei hi mihring tana hlauhawma a awm a nih loh chuan thah emaw, man emaw chu dan bawhchhiatna a ni tih a tar lang.
Kerala-a mihring a beihna hi January 13-a Mananthavady forest range, Wayanad district-a thleng a ni a. Thi hi kum 50 mi niin a kut leh a ke-ah hliam tuarin damdawi ina lak a ni a, damdawi in danga kalpui a nih laiin a thi a. Medical report-ah chuan ‘thisen chhuak nasa lutuk’ vanga thi anga tar lan a ni.
A thih hnuah hian tual chhung mite chu forest thuneitute lakah thinrimin sakei chu that turin an ti.
Tual chhung chanchinbute chuan Saseendran-a hnenah pawh hian suat then an ngaih thu hi an thlen a ni.
Minister pawh hian suat chu tual chhung mite rawtna a nih thu a sawi a. “Ramsa hi thunun dan tur kan dap mek a, suat an nih dawn pawhin tih rum rum an ni dawn lo,” a ti.
Conservationist leh sakei chanchin hria, Dr Ullas Karanth chuan kum 50 liam ta chhungin sakei hi sang vel chauhvin an pung tih a sawi a, an punna a tlem em em niin a sawi.