Crystal Palace midfielder Michael Olise chuan minute 91-naah freekick ‘cial’ zet mai a khung a. Manchester United in pahnihna dinhmun an luah tur chu dalin 1-1 in an inhnehtawk.
Nilaini zan Premier League inkhelah United hi a zawna vawi 10 an chakna ni turin hnehna an chang hman teuh hle. First half-ah Bruno Fernandes chuan Christian Eriksen-a siamsak goal chiang takin a khung a. He goal hi an chakpui dawn niin a lang.
Mahse Olise-a’n dinglam sir atang freekick mawi a khung a. United in pathumna an hauh chhunzawm a. Manchester City nen an point hmuh zat a inang mek.
Lawm leh lawm lo
Manchester United in coach Erik ten Hag hnuaiah hma an sawnna a kal zel a. A zawnin match thum tlawm lovin an kal tawh a, heng zingah hian vawi 9 an chak.
Inelna hrang hrangah match 20 chhungin vawikhat chiah tlawm an nei. Hei vang hian season tirah a sang pali zinga tel chu an tum ber a ni a, nimahsela an kal chhohdan avangin mi tam takin title inchuhnaah an sawi tel tawh.
Pathianni zana hmahruaitu Arsenal hmachhawn tur an nih avangin an tan chak a pawimawh a. Point khat hmu mahse point hnih hlohah an inngai ang.
Lehlamah Patrick Vieira pawlte hi a zawna vawi thum tlawm an ni a, tunhnaiah kheltha thin mahse goal an khung theih loh an tuar thin. An tan tlawm loh mai bakah point khat an hmuh dan chu an hmabak inkhel tur atan anmahni kaithotu a ni thei thung.
United coach, “Minute hnih a la awm a, chak thei dinhmun hloh hi a na. Goal hnihna khung turin kha aia nasa zawka kan beih kha a ngai a ni.” tiin a sawi zui.