Pakistan Prime Minister Shehbaz Sharif chuan ‘Kashmir boruak sa tak’ sawi dunpuiah India chu a sawm a, hetih rual hian ram pahnihte inkara inhriat thiam lohna awm titawp turin United Arab Emirates chu a sawm bawk.
UAE hi kar hmasaa a tlawh tum khan ‘a unau ram’ tiin Sharif-a hian a sawi a. Thawhlehnia Al Arabiya-in an kawmna a tihchhuahah, “India nena khunkhan taka inbiak tum ka duh a; mahse, mi pahnih thutlukna a ngai,” a ti.
“Indian hruaitu leh Prime Minister Narendra Modi hnena ka chah duh chu dawhkan kila thuin, Kashmir ang chia kan buaina hi khunkhan taka sawi dun ka duh a ni,” tiin Sharif chuan a sawi.
Himalaya tlangdunga awm, Kashmir hi British rorelna lak atanga kum 1947-a ram pahnihte an chhuah hnu atang khan an buaina a la ni ngar ngar a. Nuclear ralthuam nei ram inthenawmte hi vawi thum indo tawhin vawi hnih hi Kashmir chungchangah a ni a, a tu ve ve pawh hian a ram pum hi an ram china an chhal ve ve a ni.
“Inthenawm kan ni a, chu chu kan hriat a ngai. Kan duhthlana inthenawm lo thei kan ni lo va, kan ni reng dawn a, zalen leh muang taka kan chen a ngai. Kan zirlai tam tak kan zir tawh a, vawi thum India nen kan indo tawh a, chu chuan nghang neiin kan tuar a, hna nei lo an tamin retheihna a nasa em em a ni,” a ti.
Kum li kal ta khan India-a rorel lai, Hindu nationalist sorkar, Modi-a kaihhruai chuan Kashmir-in danpui hnuaia inhung hranna a neih, Article 370 chu a hlip.
He thutlukna hian Kashmir huam chhungah India huatna nasa takin a awm phah a, mi tam takin duh lohna an lantir a, sorkar pawhin heng mite hi na takin a chhang let bawk.
India hian Pakistan hian heng lai phaikuama helna hi a thlawp a, a pui nasa niin a puh a, Pakistan erawh chuan na takin a pha ve thung.
Sharif-a chuan Indian-in Kashmir-a thil a kalpui dan chu ‘mihring dikna chanvo palzutna lian tak’ tia a sawi rualin, ram pahnihte hian an hma hun tur an ngaihtuah a ngai niin a sawi.
“Hetiang thil hi a tawp hmak tur a ni. India hian inbiak a inpeih phawt a nih chuan keini chu an aia nasain kan inpeih zawk a. Kan theihna neihte hi thanduanna atan kan hmang duh a, chu chu Pu Modi-a hnena ka chah duh pawh a ni,” a ti.
“Nuclear kan nei ve ve a, kan indo a nih chuan kan hmabakah engnge thleng dawn tih chu Pathian thu thu a ni dawn a, tu nge hria,” tiin a sawi.
Hetianga a sawi hnuah hian Sharif-a pisa chuan prime minister hian India-in inbiak a duh a nih chuan Article 370 a hlih tawh a hnuhkir phawt a ngai tih chu a sawi chiang tih an tar lang zui.