Australian Open final vawi hnih khel tawh Daniil Medvedev chuan a vawithumna atan kuminah a khel dawn lova. Third round-ah barakhaih niin Sebastian Korda lakah a chesual chiang hle.
Melbourne Park a inelnaah hian mipa lamah seeded nihna changtu player langsarte an tla chhunzawm zel a. US Open champion hlui hi tla thar ber niin kum 22 mi Korda lakah hian 7-6 (9-7) 6-3 7-6 (7-4) in straight set in a tlawm.
Tun tum mipa inelnaah hian seeded sang pahnih Rafael Nadal leh Casper Ruud te an tla tawh a. Seeded number three hauhtu Stefanos Tsitsipas erawh Zirtawpni khan a la chak chhunzawm.
Rod Laver Arena-ah Medvedev hian an inkhelh chhungin ball vuakah leh court chhunga tlan kual leh chet zawngah Korda hi a pha lo vel vek a. Kum 1998 a Australian Open champion Petr Korda fapa Sebastian Korda hian a vawikhatna atan Australian Open fourth round a khel tawh.
Korda nu Regina Rajchrtova hi tennis player thin tho a ni a, a farnute pahnih Jessica leh Nelly te erawh LPGA golfer an ni thung.
“Kan chhungkua hian Australia a inkhelh nuam kan ti hle a, hun ropui tak tak helaiah kan hmang thin. Ka farnute pahnihin Australian Open an la ve ve tawh.” tiin Korda chuan a chak hnuah an chanchin a sawi.