China-ah chuan January 13 leh 19 inkar ringawtah Covid kaihhnawiha damdawi ina thi chu mi 13,000 dawn an tling.
Hemi hma lawk hian damdawi lama sorkar thuneitu sang pakhat chuan an rama cheng mi tam zawk chuan hripui hi an kai tawh niin a sawi.
China-ah hian hemi hma chawlhkarah chiah hian Covid vangin damdawi inah mi 60,000 dawn an lo thi tawh bawk.
China-a Center for Disease Control & Prevention (CDC)-in Inrinnia an dinhmun an tihchhuahah damdawi ina awm mi 681 chu coronavirus an kai avanga thawkna lam fel lo vangin an thi a, mi dang 11,977 chu hri an kai avanga natna dangin a bawhbuai vangin an thi bawk tih an tar lang.
Sorkarin hripui avanga thi zat a puanah hian mahni chenna ina inenkawla thihpui an chhiar tel lo.
Thil awm dan thlirlawktu pakhat, Airfinity chuan China-ah hian Lunar New Year chawlh an hman mek lai hian Covid avanga thi hi ni khatah mi 36,000 vel an tling thei hial dawn niin an tar lang.
He firm hian Devember thlaa sorkarin zero-Covid policy a hman a hlih hnuah mi 6,00,000 chuangin hripui hi an thihpui tawh niin an sawi bawk.
China-ah hian Covid darh lohna tura sorkarin khuahkhirhna khauh tak a hman reng avangin hripui a len chhung khan hmun danga awmte pawhin an kum thar chawlhah hian an khua an pan thei lo va. Kuminah hian khuahkhirhna hlih tak a nih avangin mi maktaduai tel chuan an awmhmun chhuahsanin an chhungte nena chawlh hmang turin an zin a. Lunar calendar-a ni ropui ber pakhat, Pathiannia an hman tak avanga zin leh haw khawm hian hri a tihdarh nasat hle rin lawk a ni.
Hetih lai hian damdawi lama an hotu sang chuan Lunar New Year hmanga zin chhuah hian thla hnih thum chhung chu hri leng thawh hnihna a thlen kher a rinawm loh tih a sawi a, hei hi a hmain an ram mipui 80% dawnin an lo kai sa tawh zawk vang a nih dawn thu a sawi.
China Center for Disease Control & Prevention-a an chief epidemiologist Wu Zunyou chuan hri a darh phah vak a rinawm loh thu hi Inrinni khan an ram social media, Twitter ang chi, Weibo-ah a tar lang a ni.
“Hun reilo te chhung, entir nan, thla hnih thum vel hi chu hripui thawh hnihna a thawh theih chance a tlem,” a ti.
China-a transport lam thuneitute chuan February thla ringawtah mi tluklehdingawn hnih vel an zin an ring a, hei hi khawvela hun khata mi an zin chhuah tam ber tum a tling nghe nghe.